Sa Comval: dul-an 20,000 ka pamilyang biktima sa Bagyong Pablo padayong gitabangan sa Red Cross

by Gilbert M. Cabahug

COMPOSTELA VALLEY PROVINCE-----Lakip usab ang International Committee of the Red Cross (ICRC) sa mga Humanitarian Partners nga mitabang sa liderato sa probinsiya sa padayong pag-atiman sa mga biktima sa bagyong Pablo, ug matud ni Mariko Harada- Head of Office sa ICRC Nabunturan nga maoy gitabangan sa ICRC ang dul-an 20,000 ka pamilyang biktima sa Supertyphoon Pablo diha sa 36 ka mga barangay sa giilang “Hardly Hit Municipalities” nga mao ang mga lungsod sa Laak – 11 ka barangays; sa Compostela-3 ka barangays; sa Monkayo-6 ka barangays; ug sa Montevista– 6 ka barangays.

Kada bulan ang gipiling dul-an 20,000 ka pamilya sa ICRC ilang giaporan paghatag ug Family Food Packs. Usa ka Family Food Pack ang ilang gihatag sa kada pamilya matag-bulan nga dunay sulod  25 ka kilo nga bugas; 12 ka lata nga tinapa; 2 gallons nga cooking oil; 1 litro nga tuyo; asukal; kape; asin; 2 ka bars nga sabon panglaba ug uban pa.  

Ang Red Cross nanghatag sad ug essential household items sa kada pamilya nga naglangkob sa mga kaldero; toothbrush; planggana; balde; ug kitchen untensils sama sa mga plato, mga kutsara, mga tinidor, panaksan, tasa, baso ug uban pa.

Gisulti sad ni Mariko nga sama sa ubang humanitarian partners sa probinsiya ang Red Cross miapil sad sa gipalapdang Cash for Work Program ni Governor Arturo “Chiongkee” Uy sa Compostela Valley ug didto nila kini unang gihimo sa Brgy. Kidawa sa lungsod sa Laak.

Dugang tabang nga itunol sa Red Cross mao ang pagbutang ug water system diha sa pipila nga gipili nilang mga Barangay; ug ang ilang pagsalmot  sa Shelter Assistance  Program ni Gov. Uy pinaagi sa pagtukod usab ug mga balay aron pa puy-an sa mga biktima nga wa na gyuy mapuy-an tungod ang ilang balay totally damaged human mahiagom sa grabeng pagkuso-kuso sa bagyong Pablo  ang ilang dapit.  (Gilbert M. Cabahug, ids-comval)