COMPOSTELA VALLEY PROVINCE-----Gipahimangnoan karon ni Governor Arturo “Chiongkee” Uy ang publiko nga magbantay sa mga oportunista ug mga mangingilad nga magpailang iyang gisugo pagpangayo’g hinabang alang sa mga biktima sa bagyo, ug matud pa niya nga dili tuhoan ang bisan kinsang tawo nga manawag kanila ug magpailang iyang sinugo kay dili kana tinuod ug gigamit lang ang iyang ngalan alang sa ilang personal nga kaayohan.
Sa gihimong Press Conference nga gidumala sa Davao Region Multi-Media Group (DReMMG) diha sa Molave Hotel sa Tagum City niadtong Abril 18, gisulti sa gobernador nga dunay pipila ka mga kompanya ug establisemento nga nag-report kaniya mahitungod sa pipila na ka mga tawo nga nanawag sa ilang upisina ug nagpailang iyang sinugo sa pagpangayo ug hinabang alang sa Supertyphoon Pablo Victims sa Comval.
Matud sa gobernador nga wala gayud siya magsugo ug mga tawo aron mangayo’g hinabang kang bisan kinsa labi na sa mga negosyante. Ang mga hinabang nga miabot sa probinsiya buhat sa kalooy, ug kini bulontaryong gitunol sa lain-laing donors human nga sila nasayod sa kahimtang sa mga katawhan.
Kun duna may mga fund raising ang probinsiya alang sa nagpadayong paningkamot sa rebuilding, kini himoon nga usa ka opisyal pinaagi sa sulat nga ipadala kanila sa probinsiya nga pirmado sa iyang ngalan alang sa pagpahibalo, paghangyo, ug pagpangayo sa ilang suporta.
Kini usab dayag sa katawhan tungod dunay opisyal nga pagpahibalo diha sa publiko pinaagi sa lain-laing media outlets sama sa mga pahayagan kun newspapers, sa radio broadcast, ug bisan sa television.
“Wa koy gisugo pagpangayo’g donasyon alang sa mga biktima sa bagyo. Ayaw mo’g too sa mga tawo nga manawag sa inyong opisina pinaagi sa cellphone ug magpaila nga kunuhay akong gisugo nga mangayo kaninyo ug donasyon alang sa mga biktima sa bagyo kay kana pangilad ug dili tinuod,” matud ni Governor Uy. (Gilbert M. Cabahug, ids-comval)
No comments:
Post a Comment