Gagmay’ng minero sa Comval gihatagan ug Small Scale Miner’s License sa probinsiya

COMPOSTELA VALLEY PROVINCE-----Nanghatag na karon ang Provincial LGU sa Compostela Valley ug Small Scale Miner’s License ngadto sa gagmay’ng mga minero, ug maoy unang nahatagan ug Miners License I.D. sa probinsiya ang Small Scale Miners nga nag-operate sa mga minahan diha sa mga lungsod sa Nabunturan ug sa Pantukan.

Si Environment and Natural Resources Department Chief Eugene Alaba sa Provincial Agriculturist Office (PAGRO) nagsulti, nga ang I.D. sa gagmay’ng mga minero nga gitunol sa probinsiya adunay semblance of legality tungod kini pirmado mismo ni Gov. Arturo “Chiongkee” Uy nga mihatag kanila ug pagtugot nga maka-operate sa mga minahan sa lungsod.

Sa iyang pakigpulong ngadto sa gagmay’ng mga minero niadtong Abril 19 diha sa Kapitolyo atol sa usa ka adlaw’ng Seminar sa “Small Scale Mines Safety, Rules and Regulations ilalom sa DENR Administrative Order (DAO) No. 97-30 nga gitabangan pagdumala sa probinsiya ug sa MGB, giawhag ni Governor Uy ang gagmay’ng mga minero nga ilang ampingan ang gihatag kanilang I.D. sa probinsiya kay dako kini’g ikatabang sa ilang security ug sa uban pang mga panginahanglan kalabot sa ilang pagmina diha sa mga kabukiran.

Giklaro usab sa gobernador nga bisan pa man kun  pagbulut-an sa National nga gobyerno ang pagpadagan sa industriyang extractive labi na  sa mina, apan padayon siyang mobarog alang sa gagmay’ng nga minero aron sa pagpanalipod sa ilang mga katungod ug pribilihiyo. (Gilbert M. Cabahug, ids-comval)