Kita sa Tagum City Musikahan gipalit ug sen aron ipanghatag sa Supertyphoon Pablo Victims

COMPOSTELA VALLEY PROVINCE-----Gipamalit na ug mga sen sa Tagum City Local Government Unit ang gikita niini sa bag-o nahumang Musikahan Festival sa siyudad aron ipanghatag sa mga biktima sa Supertyphoon Pablo.

Niadtong Abril 18, malipayong gitunol mismo ni Tagum City Tourism Council Chair Madam Alma Uy ang 800 ka plegong 10’ corrugated G.I. Sheets ngadto kang Governor Arturo “Chiongkee” Uy aron nga kini ipang-apud-apod  sa probinsiya ngadto sa Supertyphoon Pablo victims diha sa Brgy. Andap, New Bataan nga partially damaged ang mga balay human maigo sa grabeng pagkuso-kuso sa milabay’ng bagyo.

Sa gihimong ceremonial turn-over didto sa Kapitolyo, malipayong gipaabot ni Governor Uy ang iyang dakong pasalamat sa Tagum City LGU, ug matud pa niya nga ang siyudad ilalom sa maayong pagdumala ni Mayor Rey T. Uy maoy usa sa mga nag-unang LGU sa nasud nga mitunol ug daghang hinabang sa probinsiya sa Compostela Valley human nga kini naigo sa Supertyphoon Pablo niadtong Disyembre 4, 2012.

Dugang sa minilyon nga kantidad sa pagkaon ug uban pang relief goods nga ilang gihatag sa probinsiya ang 22 ka mga chainsaw nga gitunol mismo ni Mayor Rey T. Uy sa Kapitolyo.  Maoy gihatagan ni Gov. Uy niini ang 11 ka mga lungsod.  Ang kada Municipal LGU gihatagan sa gobernador ug tag-duha ka mga chainsaw nga nakatabang ug dako sa nagpadayong clearing ug debris management diha sa mga kabaranggayan.

Kahibaloan nga tungod sa grabe ka kusog sa Supertyphoon Pablo nga miigo sa onse ka mga lungsod, daghan kaayong punoan sa dagkong mga kahoy ug mga lubi nga nangatumba sa mga kabalayan ug mga kadalanan.  Gani human sa bagyo dili na halos maagian ang daghang mga kadalanan lakip na ang National ug Provincial Roads.

Dugang kaayohan nga nahatag sa maong mga chainsaw mao nga ang ginabas nga kahoy ug mga lubi nahimong dugang tinubdan sa lumber materials nga gigamit sa liderato sa probinsiya sa padayong pagpang-ayo sa partially damaged houses ug sa gitabangan pagtukod nga bunkhouses sa probinsiya, sa DSWD, sa lain-laing LGUs, sa mga local donors, ug sa uban pang humanitarian partners. (Gilbert M. Cabahug, ids-comval)