IOM nagtukod 300 ka mga balay alang sa Typhoon Pablo Victims sa Comval

by Gilbert M. Cabahug

  

Lakip usab ang International Organization for Migration (IOM) sa mga International Partners sa probinsiya nga mitabang sa Typhoon Pablo Victims sa Compostela Valley pinaagi sa pagsalmot sa Shelter Assistance Program ni Governor Arturo “Chiongkee” Uy.

Gitug-an ni IOM Provincial Coordinator Rizalino Delos Santos nga isip tampo sa  nagpadayong Shelter Assistance Program sa probinsiya, ang IOM mitukod karon ug 300 ka mga balay diha sa pipila ka mga lungsod labi na diha sa mga giilang Hardly Hit Municipalities.

Sa 300 ka mga balay nga ilang commitment sa probinsiya, 110 na niini ang ilang nahuman.  Duna nay 42 units nga ilang nahuman pagtukod  diha sa New Bataan; 46 units sa Compostela; ug 22 units sa Montevista. Samtang nagpadayon pa ang ilang pagtrabaho sa laing 7 ka mga balay diha sa New  Bataan; laing lima sa Compostela; 10 sa Monkayo; 19 sa Montevista; ug 39 sa Nabunturan.

Ang ilang gitukoran niini mao kadtong biktima sa bagyong Pablo nga wa na gyoy balay’ng kapuy-an tungod ang ilang balay totally damaged human maigo sa grabeng pagkuso-kuso sa milabay’ng bagyo.

Naa sa gikan P35,000.00 hangtud sa P38,000.00 ang nagasto sa IOM sa kada balay  nga ilang gitukod, ug kini  diha ra sad nila tukora duol sa naguba nga balay sa ilang gihatagan niini. Single detached ang balay nga ilang gitukod ug kini giatopan nila sa sen ug nipa.  (Gilbert M. Cabahug, ids-comval)