72nd I.B. nagtukod ug 8 ka balay sa Compostela atol sa malampusong “National GK Build 2013”

 COMPOSTELA VALLEY PROVINCE-----Sa ilang pagsalmot sa bag-o nahumang “National GK  Build” 2013 diha sa “ SOP Kahiusahan USWAG GK Village” niadtong Marso 23-27 walo gyod ka mga balay ang gitukod ug dungan sa  72^nd Alpha Company Bayani Team.

Samtang duha sad ka mga balay ang giangkon pagtukod sa  10^th ID ug tungod niini  miabot gayud sa napulo ka mga balay ang natukod sa mga kasundalohan atol sa malampusong “National GK Build 2013” nga mao ang dungan nga pagtukod sa mokabat 50 ka mga balay (25 duplex houses) diha sa  “ SOP Kahiusahan USWAG GK Village”  sa Brgy. Osmeña  sa  Compostela.

Tungod duna nay daang 38 ka mga balay ang “SOP Kahiusahan USWAG GK Village” ang unang ihap nagsugod sa House no. 39 ug maoy nagtukod niini ang bayani Team sa College of Saint Benilde.

Ang mga balay nga gitukod ug dungan sa 72^nd  Alpha Company Bayani Team mao ang House Nos. 81, 82, 83,84,85,86,87, ug 88. Ilang mga kauban ang Ruthsils Minerals sa House No. 81; ang Team LTO Comval sa House no.82; ug ang Team LGU Montevista  sa House No. 84.

Ang mga kauban sa 10^th ID mao ang DENR PENRO ug CENRO sa House No. 79 ug ang Apawan Family sa House No. 80.

Sa gihimong Culmination Program sa lima ka adlaw’ng National GK House Build,  ang 72^nd Alpha Company Bayani Team maoy giilang “Biggest Bayani Builders”, ug mismong si Governor Arturo “Chiongkee” Uy maoy mitunol kanila sa usa ka nindot nga Plaque nga maoy timaan sa dakong pag-ila ug pasalamat sa Probinsiya ug sa Gawad Kalinga National Leadership sa ilang dakong gikatampo sa  malampusong “Gawad Kalinga Build 2013” diha sa SOP Kahiusahan USWAG GK Vlllage sa Compostela. (Gilbert M. Cabahug, ids-comval)