COMPOSTELA VALLEY PROVINCE-----Gawas sa ilang pagsalmot sa Shelter Assistance Program ni Governor Arturo “Chiongkee” Uy pinaagi sa pagtukod ug mga balay, ang Intenational Oraganization for Migration kun IOM nakatabang sad ug dako sa liderato sa probinsiya sa pag-atiman sa Supertyphoon Pablo Victims pinaagi sa pagpanghatag ug Family Emergency Shelter Kits.
Si IOM Provincial Coordinator Rizalino “Jorie” Delos Santos nagsulti nga dugang sa mokabat 300 ka mga balay nga ilang gitukod, ang IOM nanghatag sad ug Family Emergency Shelter Kits ngadto sa Typhoon Pablo Victims pipila ka adlaw human maigo sa Super Typhoon Pablo ang probinsiya sa Compoistela Valley.
Matud ni Jorie nga sa pagkakaron miabot na sa 6,653 biktimang pamilya sa Supertyphoon Pablo sa Comval ang ilang naaporan paghatag sa Family Emergency Shelter Kits diin ang kada set niini adunay trapal, gabas, martilyo, tie wire, ug lansang.
Ang ilang gipanghatagan niini mao ang mga lungsod sa Laak-1,900 ka pamilya; Nabunturan- 592 ka pamilya; Montevista 577 ka pamilya; Monkayo- 2,303 ka pamilya; ug New Bataan– 1,231 ka pamilya.
Dugang tabang ang laing gitunol nga 973 Emergency Shelter Kits gihapon; ang 273 nga Family Kits; ug ang 2,273 solar lamps nga ilang gitunol sa 2,273 usab ka pamilyang biktima sa milabay’ng bagyo.
Solar energy kun enerhiya gikan sa adlaw ang tinubdan sa power sa gipanghatag nilang solar lamps mao nga dili kinahanglan ang kuryente. Sa adlaw himoon ang pag-charge niini diha sa gawas sa balay. Ang usa ka adlaw’ng pag-charge sa maong gipanghatag nga mga solar lamps mahimo nang gamiton ug bale duha ka tibuok gabii nga pagpasiga. (Gilbert M. Cabahug, ids-comval)
No comments:
Post a Comment