Alang sa mas gipalapdang Nutrition Program ni Gov. Uy sa Comval, UN-WFP mohatag ug dugang P2 milyones

 COMPOSTELA VALLEY PROVINCE-----Pipila ka adlaw i-download na sa United Nations World Food Program (UNWFP) ang P1 million ingon nga pasiunang pundo sa saad nilang P2 milyones aron mas mapalapdan pa ang nagpadayong Nutrition Program ni Governor Arturo “Chiongkee” Uy sa Compostela Valley. Kini human sa malampusong pagpirmahay sa usa ka Tripartite Agreement sa probinsiya, sa UN-WFP, ug sa Department of Health (DOH).

Ang MOA Signing malampusong gihimo sa Kapitolyo niadtong Abril 22 ug maoy mipirma niini sila si Governor Uy alang sa probinsiya sa ComVal; si UN WFP Mindanao Operation Head Masanobo Horie nga maoy nagrepresentar kang UN WFP Country Director Aomo Asaka Nyangara;  ug DOH Region XI Director Dr. Abdullah B. Dumama Jr. alang sa DOH.

Mga saksi sa malampusong MOA Signing sila si Asst. Provincial Planning & Development Officer Raymundo Pajarito nga maoy Provincial Nutrition Action Officer (PNAO); si Provincial Health Officer Dr. Renato Basañes;  si Leo Dominador Fajardo- Head of Mission sa UNICEF- Davao; si Asst. PHO Chief Dr. Georgie Arvin Legaspi;  si PEEMO Chief Dr. John Edward Coloma; ug Nutritionist-Dietician Perpetua R. Labadia sa Center for Health Development (CHD) - DOH Region XI.

Ilalom sa giprmahang Tripartite Agreement ang UN-WFP mohatag ug dugang ayuda nga P2milyones sa probinsiya aron mapadayon hangtud sa bulan sa Hunyo ang gihimong “Nutrition Management in Emergency Situation Project” nga giimplementar ni Gov. Uy pinaagi sa Provincial Nutrition Council diha sa giilang Hardly Hit Municipalities nga mao ang mga lungsod sa Compostela, sa New Bataan, Monkayo, Montevista, ug sa Laak. Samtang ang probinsiya mogahin usab ug pundo nga P717,166.80 alang sa maong tumong.

Gawas sa itunol nilang P2milyones ang UN-WFP, mohatag usab ug 464,760 ka kilong bugas humay; 46,476 ka kilong  mongo beans; ug dugang 1,024 kahon nga Ready to Use Supplementary Foods (RUSF) alang sa Moderately Acute Malnutrition (MAM). Maoy hatagan niini ang mokabat 11,619 Typhoon Pablo Victims diin ang 9,619 kanila mao ang mga nagpasusong inahan ug laing 2,000 nga mga batang gagmay sa edad 6 ka bulan hangtud 59 ka bulan.  (Gilbert M. Cabahug, ids-comval)