Tungod talagsaon ug very systematic pagkadumala ang National Gawad Kalinga (GK) Housebuild, hugot karon nga gidayeg sa GK National Leadership ang Provincial Local Government Unit sa Compostela Valley.
Matud ni Governor Arturo “Chiongkee” Uy nga ang mga dagkong opisyal sa Gawad Kalinga mipahibalo kaniya sa ilang dakong kalipay tungod maayo gayud matud pa pagkadumala sa probinsya ug sa LGU Compostela ang bag-o nahumang “National GK Build 2013” diha sa SOP Kahiusahan USWAG GK Village, Brgy. Osmeña, lungsod sa Compostela.
Ang PLGU ug ang LGU Compostela maoy nag-host niini, ug sulod sa lima ka adlaw niadtong Marso 23-27, 2013 gidungan pagtukod sa mga katawhan ang dugang 50 ka mga balay (25 duplex houses). Maoy papuy-on niining mga balaya ang 50 usab ka pamilya nga wa na gyoy balay tungod ang daan nilang gipuy-an totally damaged gyod gumikan sa milabay’ng bagyong Pablo.
Kining mga balaya maoy nahidugang sa daang 38 nga natukod sa mga katawhan atol sa malampusong 7thBayani Challenge nga gidumala sa probinsiya niadtong tuig 2011. Tungod sa bag-ong 50, miabot na karon sa 88 ang kinatibuk-ang ihap sa mga balay nga natukod diha sa kahiusahan USWAG GK Village.
Giklaro sa gobernador nga ang mga dagkong opisyal ug mga lumilihok sa Gawad Kalinga nagpahibalo kaniya nga sila nalipay tungod talagsaon ug maayo kaayo ang sistema sa gihimong House Build kay “well provided” sa mga materyales ug sa uban pang mga panginahanglan ang tanang Team Builders nga misalmot sa lima ka adlaw’ng National GK House Build sa Compostela Valley. (Gilbert M. Cabahug, ids-comval)
No comments:
Post a Comment