Gov. Uy nanghatag libreng Abono ug Cash Assistance sa Small Banana Growers

COMPOSTELA VALLEY PROVINCE-----Gisugdan karon ni Governor Arturo “Chiongkee” Uy pag-implementar ang Banana Rehabilitation Program sa Department of Agriculture (DA), ug kabahin sa maong mga lakang mao ang gihimong pagpanghatag ug libreng Abono ug Cash Assistance sa probinsiya ngadto sa Small Banana Growers aron magamit sa rehabilitasyon sa ilang sagingan nga nahiagom ug grabeng kadaot tungod sa milabay’ng bagyo.

Panahon sa gihimong pagselebrar sa 15^th Founding Anniversary ug 6^th Bulawan Festival sa Compostela Valley, si Presidente Benigno Aqiuno III pinaagi sa D.A. mihatag sa probinsiya ug dul-an sa P50 milyones pesos nga hinabang alang sa gitinguhang early recovery sa mga mag-uuma nga nahiagom sa grabeng kadaot tungod sa milabay’ng bagyo. Gikan niini adunay P21.85 milyones alang sa “Banana Rehabilitation Program.”

Si Crops Division Chief Minda Agarano sa Provincial Agriculturist Office (PAGRO) nagtug-an nga ang probinsiya nagsugod na sa pagpanghatag ug cash assistance ug libreng abono ngadto sa mga mag-uuma nga dunay pipila ka ektaryang sagingan nga nangadaot sa bagyong Pablo. P1,500.00 nga cash assistance ug upat ka sakong abono matag-ektarya ang ilang gihatag ngadto sa Small Banana Growers nga nagtanom sa lain-laing variety sa saging sama sa Cavendis, Tundan, Binangay, Cardava, Sab-a ug uban pa.

Ang pagpanghatag gisugdan na niadtong milabayng semana, ug maoy 1^st batch ang 2,000 ka ektaryang sagingan diha sa mga lungsod sa Compostela, New Bataan, Montevista, Monkayo, Maragusan, Mawab, ug Nabunturan.

Matud usab ni Agarano nga kadtong wala maapil sa 1st batch dili lang mabalaka kay mahatagan gihapon sila sa 2nd Batch nga release.  Apan kinahanglan usab nga ilang susihon kun nahiapil ba gayud ang ilang ngalan sa listahan sa mga beneficiaries nga gihatud sa probinsiya.  Kadtong Small Banana Growers nga nadaotan sa ilang tanom nga saging pero wala pa malista, kinahanglan matud pa nga sila magreport niini sa ilang Brgy. ug sa Municipal Agrculturists Office aron sila maaapil sa 2^nd Batch nga pagpanghatag sa probinsiya.  (Gilbert M. Cabahug, ids-comval)