COMPOSTELA VALLEY PROVINCE-----Sugod niadtong Disyembre 2012 hangtud karon nakahimo na ang gobyerno pagpanghatag ug hinabang pagkaon sa mga katawhan sa Laak sulod na sa napulo ka higayon. Maoy gipanghatagan niini ang mokabat 19,580 ka pamilya diha sa 55 ka mga barangay sa lungsod.
Ang mga dagkong opisyal sa Municipal Social Welfare and Development Office (MSWDO) sa Laak nagtug-an nga bisan dili kaayo ilado ang Lungsod nga nagrabehan sa milabay’ng bagyo tungod gamay ang natalang casualties, apan nag-antus matud pa sa grabeng kalisod ang halos tanang pamilya sa lungsod.
Anaa matud pa sa dul-an 20 mil ka pamilya sa 55 ka mga barangay sa lungsod ang nag-antos sa tumang kawad-on tungod nahiagom sa grabeng kadaot ang ilang mga pananom, kabtangan, pinuy-anan, ug panginabuhian human maigo sa bagyong Pablo.
Giklaro usab sa MSWDO Officials sa Laak nga ang sulod sa kada family food pack nga ilang gipanghatag adunay 10-kilos nga bugas, noodles, canned goods ug uban pang grocery items. Ang mga bugas nagagikan sa United Nations World Food Program (UN WFP). Samtang ang dakong bulto sa grocery Items nagagikan sa Department of Social Welfare & Development (DSWD) ug local donors. (Gilbert M. Cabahug, ids-comval)
No comments:
Post a Comment