Sa Comval: 215 Estudyante gipatrabaho sa Summer ilalom sa SPES ni Gov. Uy

Compostela Valley Province – Nagsugod na karon sa ilang trabaho ang mga Estudyante sa Comval Province nga maoy 1^st batch sa nagpadayong Special Program for Employment of Students (SPES) nga gitabangan pag-implementar sa Department of Labor and Employment (DOLE) ug sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, Senior Board Member Tyron Uy, ug SP Members.

Gisulti ni Provincial Administrator Virgilia S. Allones nga nagsugod na pagtrabaho diha sa mga opisina sa kapitolyo, sa lain-laing ahensiya sa Gobyerno nga nag-operate sa Comval, ug sa lain-laing opisina sa Municipal LGUs ang mokabat 122 ka mga estudyante nga maoy 1^st Batch sa SPES Babies nga gipatrabaho sa probinsiya karong tuiga.

 

Sama sa naandan matag tuig, kasagaran sa mga SPES Babies diha gihapon patrabahoa sa ilang tagsa tagsa ka mga munisipyo. Apan ang mga taga-Nabunturan diha gipa-duty sa kapitolyo ug sa lain-laing National Offices nga nag-operate sa lungsod. Unang gipatrabaho ang 122 nga maoy 1^st Batch ug magsunod ang 93 nga patrabahoon alang sa 2^nd Batch.

Samtang, giklaro ni SPES Coordinator Dinah Lynn V. Ilagan-Basco nga sa kada summer aduna gyoy mga estudyante nga gipatrabaho sa probinsiya diha sa mga opisina sa gobyerno aron nga pinaagi sa ilang madawat nga sweldo matabangan nila ang ilang mga ginikanan sa mga galastuhon sa ilang pag-eskwela sama sa mga bayronon sa eskwelahan; sa pamalitong school uniforms ug bagong sapatos; ug school supplies sama sa mga papel, ball pen, note books, ug uban pa.

Matud pa sad niya karong tuiga ang batch sa mga estudyante nga gipatrabaho ilalom sa SPES ni Gov. Uy  miabot ug 215. Duna silay sweldo nga P250.00 sa kada adlaw ug sila gipatrabaho sulod sa 20 ka adlaw diha sa mga opisina sa gobyerno. Partner sa probinsiya niini ang  Department of Labor (DOLE) nga maoy miabaga sa 40% kon P100.00 sa gihatag nga sweldo kanila sa kada adlaw. Samtang, sa probinsiya sad nagagikan ang 60% kon P150.00 sa gihatag kanilang sweldo matag-adlaw. (Gilbert Cabahug/IDS Comval)