BM Tyron: local version sa 13th ARENA XI Serbisyo Caravan himoon sa Comval

Compostela Valley Province – Aron ang tanang mga kabaranggayan sa onse ka mga lungsod maabtan sad sa labing daling panahon sa susamang mga serbisyo nga natagamtaman sa pipila ka mga Barangay sa Maco ug Maragusan panahon sa duha ka adlawng 13^th ARENA XI Serbisyo Caravan, pagahimoon sa Comval Province ang Local Version niini nga pagasugdan sa nagsingabot nga Launching sa “Barangay Walang Iwanan” nga dumalahon sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, ug SP Members.

Gisulti kini mismo ni Senior Board Member Tyron Uy niadtong milabayng Huwebes atol sa pagpabati niya sa iyang Inspiring Message sa diha nga gisugdan ang duha ka adlawng 13^th ARENA XI Serbisyo Caravan nga malampusong gihimo diha sa Brgy. New Leyte, Maco, Comval Province.

Iyang kauban nga nangulo sa Opening Day sila si SP Member Randy Opisan, SP Member Augusto Blanco Jr., DILG Region XI Director Wilhelm Suyco, NCIP Region XI Dir. Atty. Geroncio Aguio, SP Raul Timogtimog-natudlong Action Officer sa 13^th ARENA XI Serbisyo Caravan, ug Brgy. Capt. Maria Cecilia Neri nga ngapasalamat ug dako kay wa gyod maglisud ang Brgy. New Leyte pag Host niini tungod sa pag-agak ug hugtanong suporta gikan sa probinsiya nga gihatag sa Barangay.

Ang 13^th ARENA Serbisyo Caravan gihimo sulod sa  duha ka adlaw sa Abril 9-10,2015 nga giapilan sa Regional Offices sa DSWD, DENR, DOST, BFAR, D.A., AFP, PNP, PRC, NCIP, NEDA, DepEd, COMELEC, NFA, DTI, DOLE, PHIC, PAO, DAR, PRC, OPAPP, FIDA, NFA, ug uban pa.

Kini gisugdan niadtong Abril 9,2015, ug mismo si Senior Boardmember Tyron Uy maoy nagdeklara sa opisyal nga pagssugod sa hiniusang pagtunol sa nagkadaiyang serbisyo sa Gobyerno ngadto sa mga katawhan nga nahitabo human mabati ang iyang Inspiring Message.  (Gilbert Cabahug/IDS COMVAL)