30 ka lalawigan sa nasud, nakasinati og huwaw - PAGASA

Mokabat sa 30 ka lalawigan ang nakasinati karon og huwaw, matud pa sa Philippine Atmospheric Geophysical and Astronomical Services Administration (PAGASA).

Ang mga lalawigang apektado mao ang Abra, Benguet, Ifugao, Kalinga, Apayao, Ilocos Norte, Ilocos Sur, La Union, Batanes, Pampanga, Tarlac, Zambales ug Palawan.

Apil usab ang Negros Occidental, Negros Oriental, Bohol, Zamboanga del Norte, Zamboanga del Sur, Zamboanga Sibugay, Camiguin, Lanao del Norte, Misamis Occidental, Misamis Oriental, South Cotabato, Sarangani, Agusan del Norte, Surigao del Norte, Basilan ug Lanao del Sur.

Ang gipahigayong rainfall assessment sa PAGASA gikan Disyembre 2014 hangtud Marso karong tuig nagpakita nga ang mga nahisgotang lalawigan apektado sa huwaw.

Matud pa sa PAGASA, ang huwaw sa partikular nga mga lugar mahimong magbaton og below normal rainfall conditions sulod sa duha hangtud tulo ka buwan nga magsunod.

Ang buwan sa Abril makasinati og pag-ulan nga near to above normal conditions sa mga lugar sa Cordillera Administrative Region (CAR), Cagayan Valley Region, Northern Mindanao, CARAGA ug Autonomous Region of Muslim Mindanao (ARMM) kauban ang mga probinsiya sa Catanduanes, Compostela Valley, Davao Oriental ug Sarangani.

Samtang ang nahabiling parte sa nasud makasinati og mas ubos sa normal nga pag-ulan.

Gitataw usab sa PAGASA nga adunay hinay nga El Niño sa dagat Pasipiko sukad pa niadtong Oktubre sa niaging tuig. Kining maong kondisyon gipaabot nga magpadayon hangtud sa tunga-tunga sa tuig nga adunay tsansang mokusog sa pagtapos sa tuig.

Samtang gipasalig sa Palasyo nga padayon ang pagtutok sa Department of Agriculture (DA) ug mga ahensiya niini sa sitwasyon sa huwaw sa nasud. (PIA)