Comval Province gipasalamatan ang UN-WFP tungod sa padayong tabang

Compostela Valley Province – Opisyal nga gipaabot ni Gov. Arturo “Chiongkee” Uy pinaagi ni Executive Assistant Isabelo Melendres ang iyang dakong pasalamat ngadto sa United Nations World Food Program (UN-WFP) tungod padayon gihapon kini nga mitabang sa Comval Province hangtud niining mga panahona.

 Kahinumdoman nga human mahiagom ang probinsiya sa grabeng kadaot tungod sa Supertyphoon Pablo nga miigo niini niadtong Disyembre 4, 2012, ang UN-WFP maoy usa sa mga labing importanteng Humanitarian Partners nga mibubo og dakong tabang sa Comval pinaagi sa mga bugas ug uban pang mga pagkaon nga libreng gipanghatag ngadto sa mga katawhan kada adlaw.

Gani, giundang  lang ang senimanang rasyon human gikompirma nga nakabangon na ang mga katawhan sa grabeng kalisud.

 Si Executive Assistant Melendres maoy mihatag sa Welcome Message ni Gov.Uy panahon sa dul-an tunga sa adlawng “UN-WFP Project Updating and Presentation of Accomplishment Report” diha sa kapitolyo niadtong Abril 23, 2015 nga gitambongan sa mga dagkong opisyal sa USAID, PLAN International, ug UN-WFP pinanguluhan ni Ounora Daniels kauban si UN-WFP Field Monitor Tarhata Matsura.

 Apil sad sa mga mitambong sila PHO Chief Engr. Rhoderick Digamon, PPDO Chief  Romeo Celeste, OIC-PENRO Eugene Alaba, MDRRMOs, ug si PDRRMO Raul Villocino nga maoy mihatag sa Phase III Accomplishment Report sa nagpadayong Disaster Risk Reduction and Management Operation sa Comval.

 Sa iyang paghatag sa mensahe ni Gov. Uy, opisyal nga gipaabot ni Melendres ngadto sa mga bisita ang dakong kalipay sa mga katawhan sa Comval tungod panahon sa grabeng kalisud human sa bagyo ang UN-WFP maoy usa sa mga labing mahinungdanong Humanitarian Partners nga mibubo og daghang mga  hinabang.

Matud pa niya nga bisan taud-taod na ang maong panghitabo ania pa gihapon  sa Comval ang UN-WFP alang sa padayong pagbubo sa lain-laing klase sa mga ayuda nga nakatabang ug dako sa public service delivery nga nakasentro sa mga paningkamot sa Disaster Risk Reduction, Response, and Mitigation.

 Apil na niini ang ilang dakong tabang sa gitukod nga Provincial Disaster Operation Building, ug sa lain-laing klase sa mga Disaster Operation Materials, Tools, and Rescue Equipments nga gipanghatag diha sa mga kalungsuran. (Gilbert Cabahug/ IDS Comval)