Libreng bakuna sa pagbukas sa klase, ilusad sa DOH

Gitakdang magpahigayon og school-based vaccination campaign ang Department of Health (DOH) sa nagkalain-laing dapit sa nasud alang sa nagsingabot nga pagbalik sa klase.

Apil sa mga bakunang ipanghatag sa DOH ang libreng bakuna batok sa sakit nga cervical cancer o HPV (Human Papillomavirus) vaccine sa mga Grade 4 female students sa 20 ka pinakakabos nga lalawigan sa Pilipinas.

Gawas sa HPV, plano usab sa DOH nga manghatag og anti-tetanus ug anti-diphtheria booster vaccines sa may 2.43 milyong Grade 1 students sa tanang pampublikong tunghaan.

Mokabat usab sa 1.67 milyong Grade 7 students sa tanang pampublikong tunghaan ang target nilang mahatagan og bakuna batok sa tipdas, rubella, tetanus ug diphtheria.

Ang maong school-based vaccination campaign parte sa National Immunization Program sa DOH. (PIA)