Libuan ka tao nakaapil sa 13th ARENA XI Serbisyo Caravan Opening Day

Compostela Valley Province – Gisugat gyod sa nagdasok nga mga katawhan gikan sa mga kabaranggayan sa Maco Masara Lines nga gusto maangkon ang nagkadaiyang serbisyo nga gibubo sa Gobyerno, ang Opening Day sa 13^th  ARENA XI (Association of Regional Executives of National Agencies in Region XI) Serbisyo  CARAVAN diha sa Barangay New Leyte Maco, Comval Province.

Gisugdan kini niadtong Abril 9,2015, ug mismo si Senior Boardmember Tyron Uy maoy nagdeklara sa opisyal nga pagssugod sa hiniusang pagtunol sa nagkadaiyang serbisyo sa Gobyerno ngadto sa mga katawhan nga nahitabo human mabati ang iyang Inspiring Message. 

Ang 13^th ARENA Serbisyo Caravan gihimo sulod sa  duha ka adlaw sa Abril 9-10,2015 nga giapilan sa Regional Offices sa DSWD, DENR, DOST, BFAR, D.A., AFP, PNP, PRC, NCIP, NEDA, DepEd, COMELEC, NFA, DTI, DOLE, PHIC, PAO, DAR, PRC, OPAPP, FIDA, NFA, ug uban pa.

Apil sa mga mitambong sa Opening Day sila SP Member Randy Opisan, SP Member Augusto Blanco Jr., DILG Region XI Director Wilhelm Suyco, NCIP Region XI Dir. Atty. Geroncio Aguio, ug Brgy. Capt. Maria Cecilia Neri nga maoy mihatag sa Welcome Remarks.

Si 13^th ARENA XI Serbisyo Caravan Action Officer SP Member Raul Timogtimog nagklaro nga sa 13^th ARENA XI Serbisyo Caravan nahitabo ang subling pagbubo sa One Stop Shop nga Public Services Delivery nga gitabangan pagtunol sa lain-laing ahensiya sa National nga gobyerno nga nag-operate sa tibuok Davao Region, ug sa kagamhanang lokal sa Comval Province sa pagpanguna nila ni Gov. Arturo “Chiongkee”Uy ug Vice Gov. Manuel “Way Kurat” Zamora.

Sayo pa lang niadtong Abril 9 nagdasok na didto sa New Leyte Elementary School ang mabagang duot sa mga katawhan nga nagparehistro alang sa mga serbisyo sa panglawas nga libreng gitunol sa Comval Province pinaagi sa Hospital on Wheels, ug Full Force gyod sa pagtunol niini ang Health Teams sa PHO sa pagpanguna ni PHO Chief Dr. Reynato Basañes ug sa mga Hospital sa probinsiya pagpanguna ni PEEMO Chief Dr. John Edward Coloma.

Didto sad sa New Leyte Covered Court gipahiluna sa lain-laing ahensiya sa National nga Gobyerno ang mokabat onse ka Booth nga giadtoan sa mga katawhan nga gusto makakuha  sa nagkadaiyang serbisyo nga libreng gitunol sa gobyerno. (Gilbert Cabahug/IDS COMVAL)