Kampanyang ‘One Good Vote’, gilusad sa PPCRV

Naglusad og bag-ong adbokasiya ang Parish Pastoral Council for Responsible Voting (PPCRV) alang sa nasudnong piniliay sa tuig 2016.

Kini ang “One Good Vote” nga magsugod karong Mayo hangtud sa eleksyon.

Tumong niining sugpuon ang pagpamalit ug pagpamaligya og boto apil na usab ang padrino o palakasan system nga gi-konsiderar nga mga ugat sa korapsiyon ug hiwi nga pagdumala sa kagamhanan.

Matud pa sa pangulo sa PPCRV nga si Amb. Henrietta De Villa, target niini ang mga kabos o class C-D-E ug ang kabataan nga maoy naglangkob sa kapin 50 porsyento sa mga botante sa nasud ug sila usab ang kanunay nga biktima sa vote buying.

Ipaila-ila usab kanila ang matag kandidato nga ilang hatagan og grado base sa 3K o Karakter, Kakayahan ug Katapatan.

Gawas sa mga botante, sakop usab sa ‘One Good Vote’ ang mga kandidato mismo.

Gi-dapit sa Simbahang Katoliko ang tanang kandidato gikan sa bisan unsang relihiyon sa pag-apil sa usa  ka panagtapok o usa  ka rekoleksyon diin ilang palig-onon ang panaad sa pag-alagad og matinud-anon ug maayo sa katawhan.

Pagtin-aw sa Arsobispo sa Manila nga si Luis Antonio Cardinal Tagle, dili angay hatagan og kahulogan ang ilang tumong tungod kay gihimo lamang nila kini aron tabangan ang Commission on Elections (Comelec) sa pagpatuman og limpyo, malinawon ug kasaligang piniliay. (PIA)