Comval Legislative Employees gipailalom sa Pre-Disaster Risk Assessment Orientation

Compostela Valley Province – Gipailalom karon ang tanang mga empleyado sa Legislative Department sa Comval Province sa tunga sa adlawng Pre-Disaster Risk Assessment (PDRA) Orientation nga kabahin sa mas gipakusog nga “Disaster Preparedness and Response Program” sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat Zamora, Senior Board member Tyron Uy, ug SP Members.

Gihimo kini sa SP Session Hall sa kapitolyo niadtong Mayo 14, 2015 ug mismong si SP Secretary Thelma Yumang maoy nagpaila kang PDRRMO Chief Raul Villocino nga maoy facilitator sa PDRA Orientation diin ilang nakat-onan ug nasayran ang bahin sa Typhoon Tracking Exercises, Terminologies for Weather Monitoring, Sources of Weather Information, ang dugang pang Automatic Rain Gauges nga gipalit sa probinsiya, ang gipangtaod na nga Water Level Monitoring Sensors, ug ang planong  pagbutang sa probinsiya ug Water Level Monitoring Sensors.

Apil sad sa iyang mga gihisgotan ang Flow of Early Warning System (EWS), ang bahin sa Location Coordinates sa direction sa bagyo, ang bahin sa Fijuwara Effects, ug ang bahin sa Tropical Cyclone nga nailhan sa lain-laing ngalan sa lain-laing rehiyon sa kalibutan nga mao ang Hurricane, Cyclone, Willy-willy, ug Typhoon.

Gisugdan kini sa paghatag ug Rationale ni Asst. SP Secretary Ivan Kleb Ulgasan nga maoy nagpasabot  sa kamahinungdanon nga sila  makabaton ug igong kasayuran sa Disaster Risk Assessment sa probinsiya labi na nga ang tanan apektado gyod sa climate change ug sa disaster nga usa ka “universal matter.”

Kinahanglan matud pa niya nga ang kasayuran bahin niini mahatagan ug dakong importansiya sa tanan, apil na sa ilang han-ay nga gikinahanglan kaayo ang pagpakabana bahin niini labi na nga ang ilang trabaho sa kanunay nagtumong sa public services delivery  ingon nga katabang sa mga magbabalaod sa probinsiya. (gilbert cabahug/ids comval)