Tungod taas kaayo ang demand sa Export Market sa VCO, DTI tabangan ang Cocolife Cooperative sa Pantukan

by Gilbert M. Cabahug

COMPOSTELA VALLEY PROVINCE-----Giklaro karon ni DTI-ComVal Program Manager Atty. Lucky Siegfred Balleque nga tabangan gayud sa Department of Trade and Industry (DTI) ang Coco Life Cooperative sa Pantukan nga mas mokusog pa ang ilang production sa Virgin Coconut Oil (VCO) tungod kusog kaayo ang demand niini sa Export Market.Kini pinaagi sa Production Equipment nga itunol mismo sa DTI sa dili pa matapos ang bulan sa Hunyo 2013.

Si Atty. Balleque maoy mihatag sa DTI Report panahon sa gihimong 2nd Quarterly Meeting sa Provincial Small and Medium Enterprise Development (PSMED) Council nga malampusong gihimo diha sa Sanitary Function Hall sa Nabunturan niadtong Hunyo 11, 2013.  Ang ilang Meeting gidumala ni PSMED Council Chair Governor Arturo “Chiongkee” Uy pinaagi ni Executive Assistant Isabelo Melendres.

Sa iyang paghatag sa DTI Report niadtong adlawa, gitug-an ni Atty. Balleque nga karong bulana ihatag na sa DTI ang ilang tabang nga Production Equipments sa paghimo’g Virgin Coconut Oil ngadto sa Cocolife Cooperative nga gipanguluhan sa ilang Chairman of the Board nga si Mr. Rudy Ang.

Pinaagi sa Production Equipment nga Ball Bearing Cream Separator, Containers, ug uban pa nga ihatag sa DTI, giklaro ni Atty. Balleque nga madugangan gayud sa Cocolife Cooperative ug laing 2,000 liters kada bulan ang ilang Volume Production sa VCO.  Tungod niini, mamahimo nang 5,000 liters sa kada bulan ang ilang volume production sa Virgin Coconut Oil  gikan 3,000 liters lang nga maoy ilang daang Volume Production sa kada bulan.

Gitug-an usab ni Atty. Balleque nga  sa daan nilang Volume Production, dili pa makadirekta ang Cocolife Cooperative pagbaligya sa ilang produktong VCO ngadto sa export market ug diha pa lang sila karon naga-supply sa mga consolidators nga maoy direktang naga-export niini.

Gipaneguro usab sa DTI matud pa ang padayong pagtabang sa nasangpit nga kooperatiba aron nga sa moabot nga panahon, maablihan ang dakong oportunidad nga direkta nang makabaligya sa gawas ang Cocolife Cooperative sa ilang produktong Virgin Coconut Oil.  (Gilbert M. Cabahug, ids-comval)