by Gilbert M. Cabahug
COMPOSTELA VALLEY PROVINCE-----Miabot gayud sa 3,108 pasyenteng Comvaleño ang nakabenepisyo sa libreng serbisyo sa panglawas nga gitunol sa probinsiya panahon sa Summer ilalom sa mas gipalapad ug mas gipahugtang Provincial Health Outreach Program ni Gov. Arturo “Chiongkee” Uy gamit ang usa ka modernong Hospital on Wheels (HOW) sa probinsiya.
Ang Hospital On Wheels sa Comval mao ang usa ka dakong Bus nga dunay lain-laing mga lawak alang sa Medical, Dental, ug Surgical Procedures. Aircon ang maong mga lawak nga sangkap sa mga pasilidad. Ang pagtunol sa probinsiya ug libreng serbisyo sa panglawas gamit ang Hospital on Wheels magbalhin-balhin sa lain-laing mga baranggay sa onse ka mga lungsod.
Sakay niini ang gipadalang Health Teams sa probinsiya nga kasagaran mao ang mga Staff diha sa Provincial Health Office (PHO) sa pagpanguna ni PHO Chief Dr. Renato Basañes. Apan dunay panahon nga motabang sad kanila ang mga Doctors, Nurses, ug uban pang Health Care Providers gikan sa PEEMO nga sakop usab ni PEEMO Chief Dr. John Edward Coloma.
Gitug-an mismo ni Dr. Juan C. Secuya-Provincial Health Outreach Program Coordinator nga gikan Abril hangtud Mayo 2013, miabot gayud sa 3,108 pasyenteng Comvaleño diha sa mga kabaranggayan ang nahatagan sa probinsiya ug libreng serbisyo sa panglawas nga naglangkob sa libreng opera-17 ka mga pasyente; libreng tuli- 808; libreng ibot-ngipon– 1,176; ug libreng konsulta sa doktor-1,107. Ang tanang mga pasyente gihatagan usab sa probinsiya ug libreng mga tambal.
Gikan sa Abril 10 hangtud Mayo 27, 2013 ang mga barangay nga naserbisyohan sa Hospital on Wheels sa probinsiya mao ang Brgy. Ogao sa Nabunturan, ang Brgy. Kidawa sa Laak, Brgy. Langgam sa Maco, Brgy. Mt. Diwata sa Monkayo, Brgy. Pobacion sa New Bataan, ang Brgy. Pindasan sa Mabini - diha sentro ug sa Sitio Labuan, Brgy. San Isidro sa Monkayo, ang Brgy. New Visayas sa Mawab, ug ang Brgy. Tapia sa Montevista. (Gilbert M. Cabahug, ids-comval)
No comments:
Post a Comment