Tuesday, June 18, 2013

NNC nanghatag Cash Assistance ug Logistics Support sa Comval BNS

Tungod apil sad sila ug ang ilang tagsa-tagsa ka pamilya sa kapin 140,000 pamilyang Typhoon Pablo Victims sa probinsiya sa Compostela Valley, mihatag sad ang National Nutrition Council (NNC) ug Cash Assistance ug uban pang Logistics support ngadto sa Brgy. Nutrition Scholars (BNS), ug maoy unang nakabenepisyo niini ang mga BNS diha sa mga lungsod sa New Bataan, Compostela, Montevista, Monkayo, sa Laak, ug sa Maragusan.

Niadtong Hunyo 17, 2013 dunay 195 ka BNS ang gihatagan sa Cash Assistance nga P10,000.00 ang kada usa, ug mismong si Region XI Nutrition Program Coordinator Dr. Maria Teresa Ungson maoy mitunol niini ngadto kanila ug sa unom ka Municipal Nutrition Action Officers (MNAOs) ug sa unom sad ka Municipal Nutrition Coordinators (MNCs) diha sa gipanghatagang mga lungsod.

Gawas sa gitunol nga cash assistance niadtong adlawa, ang kada usa kanila gihatagan sad ug bag nga dunay sulod nga t-shirt ug Office Supplies aron mahulipan kadtong daan nilang Office Supplies nga nangdaot gumikan sa milabay’ng Bagyong Pablo.

Sa iyang paghatag ug mensahe gipasabot ni Dr. Ungson nga nasayran sa National Nutrition Council ang kahimtang sa mga BNS sa Comval, nga diin bisan pa man nga sila usab apil sa mga natalang biktima sa bagyo apan padayon gihapon sila nga nagalihok diha sa ilang tagsa-tagsa ka mga baranggay aron makaabot sa mga katawhan ang gikinahanglang serbisyo sa panglawas nga libreng gitunol sa gobyerno.

Giklaro usab ni Dr. Ungson nga bisan pa man kun nag-atubang karon ang probinsiya ug dakong hulga sa problema sa panglawas, padayon gihapon ang ComVal nga nag-una sa Nutrition Program sa Region XI tungod sa gibansay’ng best Practices sa Provincial Nutrition Council nga gidumala ni Gov. Arturo “Chiongkee” Uy nga maoy Chairman niini.

Matud usab ni Dr. Ungson nga maoy nag-unang tumong sa gihatag nilang P10,000.00 Financial Assistance ang paggamit niining kwartaha sa mga BNS aron mahulipan ang ilang nagasto sa pagpaayo sa nadaot nilang mga balay.  (gilbert m. Cabahug, ids-comval)

No comments:

Post a Comment