Buddhist Tzu-Chi Foundation nagtukod 16-Rooms School Buildings sa Manggayon E.S.

by Gilbert M. Cabahug

COMPOSTELA VALLEY PROVINCE-----Ang Taiwan-based nga “Buddhist Tzu-Chi Foundation maoy nag-angkon sa total rebuilding sa Manggayon Elementary School sa Compostela nga grabeng pagkaguba tungod sa Supertyphoon Pablo niadtong milabay’ng Disyembre 4, 2012, ug kini pinaagi sa bag-o lang gisugdan nila pagtukod nga 16-Rooms nga School Buildings.

Gitug-an ni PGSO Chief Arceli Timogtimog  nga apil sa gitukod nilang 16-Rooms diha sa Manggayon E.S. ang Classrooms, ug ang Administrative Buildings sama sa Library, Faculty Room, Principal’s Office, School Canteen, Multi-purpose hall, ug uban pa.

Niadtong Hunyo 24, gipahibalo mismo ni Gov. Arturo “Chiongkee” Uy atol sa Convocation Program sa mga empleyado sa Kapitolyo nga siya nalipay tungod padayon gihapon karon nga giulan ug mga hinabang ang probinsiya sa Compostela Valley nga diin, usa sa mga mihatag ug dakong tabang sa probinsiya mao ang Buddhist Tzu-Chi Foundation.  Ang Ground-Breaking Ceremony alang sa 16 rooms nga school buildings nahitabo matud pa sa unang semana sa bulan sa Hunyo 2013.

Kahibaloan nga niadtong Enero 5-6, 2013 ang Buddhist Tzu-Chi Foundation mituyo gayud pagduaw sa ComVal, ug sila nanghatag ug hinabang sa mga biktima sa bagyo.  Sa Enero 5 sila nanghatag ug relief goods sa Compostela ug pagka-Enero 6 didto na sad sila nanghatag sa New Bataan.  Ilang nakauban si Gov. Uy sa duha ka adlaw nilang pagpanghatag ug hinabang sa Typhoon Pablo Victims.

Matud ni Gov. Uy nga bag-o sa iyang kasinatian ang gihimo sa “Buddhist Tzu Chi Foundation” nga diin bisan sila nga biktima sa bagyo gipahatag sad ug hinabang ngadto sa mga posibleng mamahimong biktima usab sa kalamidad.  Apan luyo niini nakadayeg gayud siya ug dako tungod sa maayong resulta ug gani tungod sa maayo nilang pagpasabot halos tanang biktima sa bagyo nga nakatambong miduol gayud sa alkansiya aron pagtunol sa ilang donasyon.

Dako sad matud pa ang iyang pagdayeg sa mga mahinungdanong butang nga  gibansay  sa Buddhist Tzu-Chi, labi na sa gabayan sa success in life nga gitudlo ni Master Cheng Yen sa Taiwan nga mao ang kanunay’ng paglitok sa maayong mga pulong (say good words); ang kanunay’ng paghuna-huna ug mga maayo (think good thoughts); ug ang kanunay’ng pagbuhat ug matarong (do good deeds).  (Gilbert M. Cabahug, ids-comval)