By: Erwin Cubio – CIO Panabo
Gatusan ka mga taga barangay Cacao ang mapasalamaton sa libreng medical-dental nga gidumala sa City Mayor’s office, ilalom sa City Health Office (CHO) nga gipahigayon sa ilang gym kaniadtong Hunyo 18 ning kasamtangang tuig.
Mga dentista ug doktor gikan sa CHO ilawom sa pagdumala ni City Health Officer Dra. Emelda T. Bendijo ang nangadto, uban ang mga staff sa City Mayors Office ug mga barangay functionaries maoy nagpahigayon sa maong libreng medical check-up, blood pressure check-up, cholesterol ug blood sugar testing.
Kuyog usab si Dra. Helen Anajao usa sa Outstanding Panaboans sa nilabayng 12th Araw ng Panabo culmination program. Iyang adbokasiya nga motabang gayod sa mga kabus ug nanginahanglang katawhan.
Gipang apod-apod sa mga pasyente ang mga amoxicillin drops and capsules, mefenamic acid, paracetamol drops ug tablets, uban sa ascorbic drops, tablets ug syrups.
Si Mary Grace Cariñosa usa ka lumulupyo sa barangay Cacao nagpasalamat ug dako sa local nga panggamhanan sa pagtabang ilabi na sa serbisyong panglawas.
“Dako ang among pagpasalamat sa City Government, labi na kay Mayor Jose L. Silvosa, Sr. sa mapadayononng pag-atiman sa mga kabus, sa libreng check up ug tambal. Dako kaayo kinig tabang sa among kawad-on, labi na sa among mga anak nga kulang sa bitamina,” sigun ni Mrs. Cariñosa.
Daghang residente usab ang libreng nakapaibot sa ilang daot nga ngipon, naka-pakonsulta sa doktor ug nakadawat sa mga libreng tambal ug bitamina gikan sa buhatan ni Mayor Jose L. Silvosa, Sr. sila mapasalamaton gayod sa grupong naghatag sa ilang serbisyo sa pagtambal sa mga tao nga walay ikabayad sa doctor.
No comments:
Post a Comment