Tuesday, June 18, 2013

Mga bato sa New Bataan gilantaw ang dakong potential sa livelihood. Comvaleño Artist tudloan sa Stone Craft

Compostela Valley Province–----Gilantaw karon sa liderato sa probinsiya ang dakong potential sa  talagsaong klase sa mga bato nga makita diha sa lungsod sa New Bataan nga mamahimong usa sa mga mahinungdanong tinubdan sa livelihood kon panginabuhian sa mga katawhang Comvaleño labi na ang Typhoon Pablo victims.

Ilalom sa maong katuyoan ang probinsiya mohatag karon ug libreng training sa Stone Craft  ngadto sa mailang  potential artists nga mga Comvaleño, ug sa himoong pagtunol sa libreng Training maoy partner sa probinsiya ang DTI, DOST, ug ang Mediatrix Foundation diha sa New Bataan.

Sa unang batch paapilon sa himoong mga pagbansay ang mga sakop sa Mary Mediatrix Foundation nga gidumala ni Fr. Edgar Tuling aron nga ang ilang talagsaong abilidad ug kahanas sa Woodcraft mapalapad ngadto sa stone craft kay mas dali silang makakat-on niini nga sa ingon sulod lang sa pipila ka adlaw’ng libreng training makahimo dayon sila ug stone craft products nga halinon ug himalitan diha sa merkado.

Sa Report ni Provincial Tourism Officer Cristine  Dompor nga gibasa ni Mr. Jimmy Abayon sa Provincial Tourism Office niadtong Hunyo 11 panahon sa 2nd Quarterly Regular Meeting sa Provincial Small and Medium Enterprise Development Council (PSMED), iyang gisulti nga ang umaabot nga libreng Training sa Stone Craft   pagahimoon karong Hunyo 15-22, 2013 diha sa New Bataan. Ang ilang Meeting diha  himoa sa Sanitary Hall sa Pob. Nabunturan, ug kini gidumala  ni PSMED Chair Gov. Arturo “Chiongkee” Uy pinaagi ni Executive Assistant IV Isabelo Melendres.

Segun sa gipagulang report, maoy mag-train sa mga partisipante ang usa ka International Sculptor nga si Mr. Gilbert “Bergano” Alberto sa probinsiya sa Ifugao nga mipadayag sa iyang commitment sa pagbansay sa Comvaleño Artists sa “Riverstones and Driftwood Sculptures”. Siya nagagikan sa iladong woodcarvers nga pamilya sa Hapao, Hungduan, Ifugao ang dapit nga nahimutanagan sa iladong “Banaue Rice Terraces”.

13 anyos pa lang nagsugod siya sa wood carving apan sa paglabay sa panahon nag-shift siya sa “riverstone and driftwood sculptures” tungod iyang nakita ang kaabunda sa mga materyales niini diha sa “driftworld”. Matud pa niya nga ang mga materyales gikan niini pwedeng makuha nga libre kon walay bayad. Pero human sa mga artisitkong paglilok kini mamahimong mobili ug labaw pa sa mga dayan-dayan  nga hinimo gikan sa mahalong mga butang.  (gilbert m. cabahug, ids-comval)

No comments:

Post a Comment