Sa ComVal: Mga sundalo ug civilian gi-harvest ang mga tanom nilang gulay

by Gilbert M. Cabahug

Nag-uban karon ang mga kasundalohan ug mga civilian  pag-harvest sa tanom nilang mga gulay sulod mismo sa kampo sa Alpha (Action) Company, 72nd IB, 10th ID sa  Philippine Army diha sa Brgy. Libasan, Nabunturan, Compostela Valley Province atol sa hiniusang pagsaulog sa 1st Harvest Festival sa kampo.

Sa usa ka adlaw’ng Harvest Festival daw walay gibating kakapoy ang mga sundalo ug katawhan diha sa Brgy. Libasan sa pagpamupo sa himsog ug bus-ok kaayong mga bunga sa tanom nilang mga gulay nga mao ang mga talong, kalabasa, water melon, mga upo, mga kalikot, atsal, ug kamatis. Sa dinahon mao say ilang gi-harvest niadtong adlawa ang himsog ug tambok nga mga dahon sa tanom nilang upland kangkong.

Sa wala pa nila sugdi ang harvest dunay gihimong field tour sa mga katawhan ug mga dagkong opisyal nga mitambong, ug panahon sa gihimong paglibot sa mga pananom, halos ang tanan niadtong mga miapil nagpadayag sa gibating kahimuot tungod sa makaiibog nga talan-awon sa mga preskong utanon sulod sa kampo nga niadtong higayona naghulat sa mokab-ot nga mga kamot sa harvester.

Human niadto, ang usa ka hamubong programa nga gisugdan sa mga pag-ampo sa pagpanguna sa Division Chaplain nga si Captain Pablo De Guzman. Maoy mihatag sa Opening Remarks si Brgy. Capt. Rommel Reyes nga gisundan sa Program Overview gikan ni Capt. Jovi Jan Ferido- Commander sa Alpha Company sa 72nd IB.

Mihatag sad sa ilang mensahe sila si Col. Angelito De Leon-Commander sa 1001st Brigade; si Vice Mayor Angelo Sotto nga maoy mihatag sa mensahe ni Mayor Romeo Clarin; ug si Vice Gov. Elect Manuel “Way Kurat” Zamora nga mao say nagpabati sa mensahe ni Gov. Arturo “Chiongkee” Uy.

Gitug-an ni Vegetable Program Coordinator Erwin Mesias nga ang gi-harvest nga mga gulay maoy resulta nagpadayong Season Long Training kun libreng mga pagbansay sa Vegetable Production nga  gitawag ug “Gulayan sa Kampo”.  Libre kini nga gitunol sa probinsiya, sa LGU Nabunturan, ug sa East West Seed Company ilalom sa “Vegetable Production Program” ni Gov. Uy sa Compostela Valley.  (Gilbert M. Cabahug, ids-comval)