Pacquiao gi awhag sa COMELEC nga likayan usa ang pakig-away sa boxing samtang gakampanya

Gi awhag sa Commission on Elections (COMELEC) si Sarangani representative Manny Pacquiao nga likayan usa ang pakig away isip boksidor  panahon sa iyang pagpangampanya isip kandidato sa pagka senador karong umaabot nga eleksiyon sa Mayo.

Gipahimangnuan ni COMELEC Commissioner Rowena Guanzon si Pacquiao sa posibleng dangatan kung makalapas kini sa  Fair Elections Act.

Gipaklaro ni Guanzon nga ang sobrang publisidad ni Pacquiao ang dili patas ngadto sa ubang kandidato.

“Ingon nila duna siyay away sa boksing.  Pwede kaayo, boksing. Iya kanang katungod, apan kung iyang ipakita ang iyang away diha sa TV dinhi sa nasud, sa akong huna-huna, aduna kini sangpotanan sa iyang kandidatura,” sumala ni Guanzon. (etf/PIA)

Bag-ong sistema, ipatuman batok sa anomaliya sa pag-isyu og lisensiya sa pusil

Nag-andam na og bag-ong sistema ang Philippine National Police (PNP) aron dili mapeke ang mga dokumentong isumiter kalabot sa pag-isyu og license to own and possess firearms (LTOPF).

Kini ang gipasalig ni Chief Supt. Wilben Mayor, tigpamaba sa PNP human madiskubre ang anomaliya kalabot sa ‘LTOPF for sale.’

Matud pa ni Mayor, hatagan og kagawasan ang bag-ong hepe sa Firearms and Explosives Division aron maghikyad og mga reporma sa aplikasyon sa LTOPF.

Gitataw ni Mayor nga dili apil niini ang application ug issuance sa permit to carry (PTC) firearms tungod kay lahi ang data base niini sa LTOPF.

Kahinumdoman nga 15 ka kawani sa FEO kauban ang hepe niini ang gitaktak sa serbisyo ug 12 ka indibidwal ang pasakaan og kaso tungod sa pag-peke sa neuropsychiatric exam aron makakuha og lisensya sa pusil. (PIA)

Paghatag og student fare discount, walay gipiling oras –

Walay gipiling oras sa paghatag og diskwento sa pletehan sa mga estudyante.

Kini ang gi-klaro sa Land Transportation Franchising and Regulatory Board (LTFRB) human sa insidente sa panaglalis sa pasahero ug kunduktor sa bus sa kaulohan niadtong niaging semana tungod sa isyu sa student fare discount.

Gipasabot ni LTFRB Board Member Atty. Ariel Inton nga bisan gabii na, angay hatagan og diskwento ang usa  ka estudyante basta kay school day.

Gi-klaro usab ni Inton nga dili lamang ihatag ang diskwento sa usa  ka estudyante tungod kay mosulod o gikan lamang kini sa esklwelahan.

Matud pa nga mahimo usab hatagan og diskwento ang usa  ka estudyanteng nag-research o gikan nag-OJT sa usa  ka kumpanya. (PIA)