Thursday, May 29, 2014

Gov. Uy hugtanong gikondena ang ambush patay kang Laak Mayor Navarro

Compostela Valley – Hugot karon nga gikondena ni Gov. Arturo “Chiongkee” Uy ang nahitabong ambush-patay kang Mayor Reynaldo  B. Navarro, ug matud niya nga gikasubo niya’g dako ang nahitabo kang Mayor Navarro nga suod niya kaayong higala ug  katabang sulod sa taas nga panahon sa malampusong pag-implementar sa iyang mga programang pangkalambuan diha sa Laak.

Sa pinaka-ulahing balita gikan sa taho ni Janice Ollave, ang Municipal Information Officer sa Laak nga nahitabo ang ambush-patay sa mayor diha sa Brgy. Sagayen, Asuncion  niadtong Mayo 28, 2014 sa buntag.  Migikan ang Mayor ug mga kauban sa Laak paingon sa Tagum City sakay sa iyang Montero, ug ang uban sa usa ka Pick-up nga maoy nagsilbing back-up vehicle. Apan sa ilang pag-abot sa Brgy. Sagayen nahitabo ang ambush mga alas 8:30-9:00 sa buntag.

Samtang, human sa panghitabo si 60th IB Commander Lt. Col. Bunagan nagsulti nga ang iyang sakop ug ang ginsakpan sa Asuncion Police ang nagtinabanagay karon sa usa ka makuting pagpanubay aron ilhon ang duha sa mga kauban niadtong mga mi ambush nga namatay usab human sa maong insidente.

Si Mayor Reynaldo B. Navarro ang nagsugod sa iyang political career niadtong 1987 human nga siya maoy gitudlong OIC Municipal Mayor sa Laak ni kanhi DILG Sec. Jaime Ferer, ug sa nahitabong Local Election sa 1988 siya midaug ug nahimong Mayor sulod sa tulo ka termino nga nahuman sa tuig 1998.

Human nga nasiak ang Comval gikan sa inahang probinsiya nga mao ang Davao del Norte, siya maoy gitudlong OIC Vice Governor ug sa 1998 election siya midaug ug nahimong unang Bise Gobernador sa Probinsiya.

Sa iyang kadasig nga makaaalagad sa mga katawhan siya nagpapili ug midaug nga Punong Barangay diha sa Bollukan, Laak sa 2002 Brgy.Election, Gikan niini ang iyang katungdanan misaka human nga siya maoy gipili nga Provincial Chapter President sa Liga ng mga Brgy. ug siya milingkod sa Comval SP ingon nga maoy Ex-Officio Member.

Ang iyang dakong pagmahal sa Laak nga maoy iyang Hometown maoy nakahatag  niya ug dakong kadasig sa iyang pagdagan ug pagdaug nga Municipal Mayor sa Laak sa May 2007 election. Human niini siya midagan nga way kontra sa Mayo 2010 Election, ug sa milabayng 2013 Election siya gihapon ang midaug.

Ang iyang abilidad sa public service ug ang iyang exemplary leadership giila bisan sa iyang mga kaubang Municipal Mayors sa Comval hinungdan nga siya gipiling Chapter President sa LMP sulod sa tulo ka termino. Bisan sa ubang mga lugar siya sa gihapon ang gisaligan sa ubang Municipal Mayors, ug gani siya nahimong Consistent Member sa LMP National Directorate.

Kaduha siya napili sa LMP National Executive Committee- napili siyang Executive Vice President for External Affairs niadtong 2007-20010, ug napiling Executive Vice President for Operation sa 2010-2014. Sa 2012 nahimo sad siyang LMP National President sa mubong panahon. (gilbert cabahug//ids comval)

No comments:

Post a Comment