ComVal gideklarang Under State of Calamity

by Rey M. Antibo

 COMPOSTELA VALLEY PROVINCE-----Pinaagi sa SP Resolution No. 244-2014 nga giaprobahan dayon sa Sangguniang Panlalawigan (SP) panahon sa ilang gipahigayon nga Special Session niadtong Enero 21, 2014, gideklara ang tibook probinsya sa Compostela Valley nga Under the State of Calamity.

Ang maong resolusyon giduso mismo ni Assistant Majority Floor Leader Board Member Augusto Blanco, Jr.– IP Representative.

Matud ni SP Secretary Thelma Curimao- Yumang, MPA nga ang mga rason nganong gideklara nga under State of Calamity ang probinsya tungod kay upat (4) na ka mga munisipyo ang nahaunang nag-deklara na niini.  Kini mao ang mga lungsod sa New Bataan, Montevista, Monkayo, ug Compostela.

Dugang ni SP Secretary Yumang nga ang mga basehan sa pagpasa niini mao nga kun adunay maski duha lang ka munisipyo nga modeklara nga under state of calamity ug kun adunay 20% sa total population nga apektado, ang tibuok probinsya makahimo na sa pagdeklara sa susamang estado.  Idugang pa niini ang agricultural ug infrastructure damages nga nahitabo.  Gani sa pagkakaron sa initial report, miabot na sa P108.6M ang  total amount of agricultural damages samtang P23.3M usab sa infrastructure damages.

Matud pa, ang katuyuan sa pagdeklara sa State of Calamity sa usa ka lugar, aron nga magamit ang Calamity Fund niini para sa danyos nga nasinati tungod sa kalamidad.  (Rey Antibo, IDS ComVal)