Tuesday, January 7, 2014

300 kapin Comvalenyos migradwar sa Farmers Field School

by Grace Almedilla

COMPOSTELA VALLEY PROVINCE-----Adunay 322 ka mga mag-uuma sa probinsya ang migradwar sa Farmers Field School, usa ka season-long training nga molungtad tulo ngadto sa upat ka bulan, nga gipasiugdahan sa Provincial ug Municipal Agriculturists’ Offices kauban ang Department of Agriculture (DA) isip program partner.

Ang nasangpit nga mga mag-uuma naga-concentrate sa cacao ug vegetable production.  Adunay 217 cacao farmers ug 105 vegetable farmers ang migradwar atol sa Mass Graduation niadtong Disyembre 27, 2013 sa Kapitolyo panahon usab sa Cacao Investment Forum nga gipahigayon.

Sila gipresentar ni Provincial Agriculturist Dr. Rolando S. Simene ngadto kang Governor Arturo T. Uy kinsa maoy nagkumpirma sa gihimong graduation.

Gipaambit ni Governor Uy ngadto kanila nga mga duha ka tuig na ang niagi, adunay mga dagkung chocolate producers ang mibisita sa ComVal aron mo-enganyo sa mga mag-uuma kalabot sa cacao production tungod nagkataas ang demand niini gumikan sa paspas nga pagtubo sa maong industriya.  Nakita usab nila nga potensyal kaayo ang mga kayutaan sa probinsya diha sa pag-produce ug de kalidad nga cacao nga mamahimo unyang competitive ngadto sa merkado.

Panahon usab sa Investment Forum, adunay pag-presentar ngadto sa mga migradwar sa Cacao Development Program, Production and Demand, ug Investment Potentials.  (grace almedilla, ids-comval)

No comments:

Post a Comment