Opisina sa Public Cemetery sa Panabo, Giinagurahan

Usa ka bag-ong opisina sa Panabo Eternal Garden sa Barangay Datu Abdul ang giinagurahan adtong Hunyo 10, tuig kasamtangan.

Ang Ribbon Cutting gipangunahan nila ni Mayor James Gamao, Economic Enterprise Head Nemesio Rasgo, Jr. ug Public Cemetery Incharge Samcidar Magarang ug gisaksihan sa mga Department Heads ug mga empleyado sa City Hall.

Matud ni Magarang, nga dali na makapili ug area ka-lubngan sama sa Lawn lots ug Family estate kay naa na mismo sa sulod sa sementeryo ang ilang opisina kompara kaniadto nga naa sa wet market building.

Ang Panabo Eternal Garden adunay gidak-on nga dul-an sa walo ka ektarya ug giabrihan kini adtong tuig 2014 diin dinhi usab gilubong ang kanhi Mayor sa Panabo Atty. Jose L. Silvosa, Sr. nga mipanaw adtong January 19, 2015.

Sigun ni Mayor Gamao nga prayoridad niya ang pagtubag sa mga panginahanglan nga magamit sa operasyon sa maong sementeryo sama sa dugang pagpakoral, drainage, pathway ug dugang ekipo.

Matud usab ni Rasgo, nga wala na palubngi ang daan sementeryo kay puno na kini ug sa Eternal Garden na gipahigayon ang paglubong.

Dugang pa niya nga kung kinsa kadtong buot mag balhin sa lubong sa ilang minahal sa kinabuhi didto sa bag-ong sementeryo adto lamang sa ilang bag-ong opisina. June G. Geraldo-CIO Panabo