Wednesday, June 1, 2016

AGR nanawagan nga suportahan ang “Pederalismo” ni Duterte



NANAWAGAN si Governor-elect Congressman Anthony G. del Rosario sa tanang Local Chief Executives nga suportahan ang plano ni President-elect Rodrigo Duterte sa pagbalhin sa presente

ng sistema sa kagamhanan ngadto sa porma nga Pederal. 

Si AGR nga mihakot ug 70% nga boto pagka gobernador, nag-ingon nga iyang hangyoon ang League of Provinces in the Philippines (LPP) ug ang Union of Local Authorities in the Philippines (ULAP) nga bug-os suportahan ang plano ni Duterte alang sa Pederalismo.

Matod sa sunod nga gobernador sa Davao del Norte nga mismo ang mga LGU mao ang panguna nga makakuhag kaayohan sa plano nga pagbalhin gikan sa “unitary” ngadto sa pederal nga sistema sanglit mabilin niini ang 70% nga kita sa rehiyon.

“It is only fitting that LGUs back federalism since they are the primary beneficiaries,” matod ni AGR.

Di pa lang dugay gipasar ni Congressman AGR ang House Joint resolution No. 39 nga nag-awhag sa mga kaubang magbabalaod nga tugotan ang katawhan sa pagdesisyon labot sa isyu sa pagbag-o sa 1987 nga Konstitusyon alang sa pederal ng sistema pinaagi sa usa ka constitutional convention (Con-Con) 

Si Del Rosario nga mao ang Best Performing Congressman sa ika 16 nga Kongreso nag-awhag usab sa mga magbabalaod nga tun-an pag-ayo ug debatehan ang maong importante lakang.

Matod niya nga ang Con-Con mao ang pinakamaayo, dili makapabahin ug ang pinaka klaro nga pamaagi aron makab-ot ang gikinahanglang reporma sa Konstitusyon.

Dugang sa umaabot nga gobernador nga ang maayo unya nga pagkabahin sa kinitaan tali sa nasyonal ug rehiyon mao ang kasulbaran aron makab-ot ang katibuk-ang pag-uswag ug pagpahunong sa dugay na kaayo nga rebelyon nga nag-ugat sa pagkawalay kaangayan. 
Naghinamhinam na usab si AGR labot sa dakong papel sa lokal nga mga opisyales alang sa katibuk-ang responsibilidad ug pagka may tulubagon sa pagkab-ot sa tinuod lokal kaugalingong pagdumala diha sa pederal nga estado. 

Alang kaniya ang Pederalismo magdasig sa mga LCE nga motrabaho ug maayo aron sa pagpauswag sa ilang dapit ug sa ilang mga lumulupyo.

“The local chief executives can fully harness their creativity, courage and resourcefulness in instituting reforms to advance the common good and empower the poor and marginalized segments of society,” matod ni governor-elect del Rosario said. Noel Baguio/DavNor PIO

No comments:

Post a Comment