BSP, nagpagawas og advisory batok sa identity theft

Nagpagawas og advisory ang Bangko Sentral ng Pilipinas (BSP) nga nagpasidaan sa publiko batok sa identity theft.

Ang Identity theft o pagkawat sa personal nga kasayoran aron magamit sa pagpangilad usa  ka krimen nga seryosong makaguba sa panalapi, reputasyon ug credit history sa usa  ka tawo.

Matud pa sa BSP nga kun nagduda ka nga nakompromiso ang imong personal information, kinahanglang alisdan dayon ang imong passwords, security questions nga may kalabotan sa imong personal information, ATM, ug online access.

Samtang kun ang imong personal information nagamit sa walay pagtugot, kinahanglang motawag dayon sa imong creditors o gi-utangan magsugod sa creditor diin nahitabo ang maong walay pagtugot nga transaksiyon.

Ang biktima kinahanglang mopasaka og reklamo sa Philippine National Police (PNP) Anti-Cybercrime Group o sa National Bureau of Investigation (NBI)  Cybercrime Division ug magtipig og kopya sa police report.

Ang maong report kinahanglanon sa imbestigasyon sa identity theft.

Gipahinumdoman usab sa BSP ang mga financial consumers sa pag-kooperar sa ilang bangko kun kini mangayo og dugang kasayoran aron makatabang sa pagpa-uswag sa seguridad sa iyang accounts ug maabtik nga maampingan ang personal information aron ma-protektahan batok sa identity theft. (PIA)