Monday, June 20, 2016

Mga bag-ong stalls naangkon sa manindahay ug gulay sa Panabo



Giinagorahan ug gitindahan na sa kapin 52 ka manindahay ug gulayon ang bag-ong natapos nga vegetable shed nga gitukod sa Lokal nga Panggamhanan na naa nahimotang sa sentrong bahin sa Panabo Central Market.
Ang maong inagurasyon gipangonahan nila ni Mayor James Gamao, Vice Mayor Janrey Gavina, City Councilor Mawe Pamisaran, City Economic Enterprise Head Nemesio Rasgo, Jr. ug mga kawani  sa LGU ug mga stakeholders sa Sentrong Palingke sa Panabo.

Sa hanubong programa gidasig ni Mayor Gamao ang mga vendors nga mas dugangan pa ang ilang pagpaningkamot kay andam usab ang Lokal nga Panggamhanan sa pagsuporta kanila.

Ang maong mga vendors gikan sa gidimolis nga pwesto nga namaybay daplin sa sentrong dalan sa maong palingke nga karon abri na sa mga sakyanan nga moagi.

Sigun ni Anny Buenaflor, Presidente sa Kilusang Manggugulay sa Panabo Central Market nga nagpait gyud sila labi na kadtong didto sila gipatinda sa ikaduhang andana sa usa ka building sa maong palingke kay tagsa ra ang mosaka aron mamalit sa ilang paninda. Ilang gikalipay ang pagplastar ug pagbalhin kanila sa ilang plastado ug bag-ong pwesto.

“Kung unsay inyong panginahanglan adto lang mo sa akong opisina kay andam ako sa kanunay nga modawat kaninyo.” Sigun ni Mayor James G. Gamao.

Ang pagtukod sa bag-ong vegetable shed sa Panabo gipunduhan pinaagi sa Supplemental Budget No.3 sa City Economic Enterprise Management and Development Office sa tuig 2015.
June G. Geraldo-CIO Panabo

No comments:

Post a Comment