by Gilbert M. Cabahug
COMPOSTELA VALLEY PROVINCE-----Human madawat sa probinsiya gikan sa Cacao Industry Development Association in Mindanao, Incorporated (CIDAMI) ang mokabat 33,000 ka punoang semilya sa Cacao, gimando usab dayon ni Governor Arturo “Chiongkee” Uy ang pagpang apud-apod niini ngadto sa mga mangunguma diha sa mga lungsod sa Monkayo, sa Montevista, sa New Bataan, sa Compostela , ug sa Capital Town niini nga mao ang lungsod sa Nabunturan. Angayon paghatag niini ang lima ka mga lungsod nga makadawat ug 6,500 ang kada usa.
Mismong ang Managing Director sa CIDAMI nga si Mr. Val Turtur maoy nagtunol sa mga semilya sa Cacao ngadto kang Gov. Uy atol sa Ceremonial Turn-over diha sa Kapitolyo niadtong Marso 24, 2014 nga gihimo panahon sa regular nga convocation program sa mga empleyado. Kauban sa gobernador sa pagdawat niini si P. A. Virgilia S. Allones, PAGRO Chief Dr. Rolando Simene, ug si SP Member Macario Humol nga maoy Chairman sa Committee on Agrarian Reform, Agriculture and Livehood sa Comval SP.
Apan giklaro sa gobernador nga sa himoong pagpanghatag sa liderato sa probinsiya magpadayon gihapon ang training component ug maoy pagahatagan kadtong nakaaapil sa libreng training sa pagsemilya, sa pag-alima, ug sa pag-harvest. Kini tungod taas kaayo ang success rate sa gihimong dispersal nga dunay libreng training.
Matud pa usab niya nga dool sa iyang dughan ang Cacao Industry, ug siya mismo gusto gyod magtanom ug Cacao. Kini tungod gawas sa taas nga demand ug mahal ang presyo niini, paborito niya nga pagkaon ang chocolate ug ganahan sad siya nga manghatag niini ngadto sa iyang mga higala. (gilbert m. cabahug, ids-comval)
No comments:
Post a Comment