Penongs paliton tanang Barbecue Sticks nga hinimo sa Kapitbahayan

by Gilbert M. Cabahug

COMPOSTELA VALLEY PROVINCE-----Dili na maproblema karon kun asa ibaligya ang Barbecue Sticks nga hinimo sa mga katawhang nagpuyo diha sa Basic USWAG-GK Village sa Laak.  Kini tungod ang tanang Barbecue Sticks nga ilang mabuhat paliton gayud sa Penongs Barbecue and Grills Corporation.

Gisulti mismo ni Assistant PAGRO Chief Manolo  Serafin Cayme nga panahon sa pagtunol sa liderato sa probinsiya ug sa DSWD sa mokabat 143 ka mga balay niadtong Marso 11, 2014 diha sa Laak, nahitabo sad ang pagpirmahay sa usa ka Memorandum of Understanding tali sa Penongs Barbecue and Grills Corporation ug sa Kapitbahayan sa Basic USWAG GK Village sa Laak.

Kini alang sa paspas nga production sa Barbecue Sticks nga hinimo sa USWAG-GK Village Homeowners, ug ang tanan nilang mabuhat paliton sa Penongs aron dili na sila maproblema kun asa kini ibaligya aron nga sila makakwarta.

Ang maong MOU gipirmahan niadtong adlawa nila ni Basic USWAG GK Village Kapitbahayan President Mr. Reynaldo Ganza ug Penongs Corporation Chief Operation Officer Mr. Ace Cayunda diha sa Brgy.Kaligutan lungsod sa Laak.

Apan una niini, ang gihimong pagtunol sa 143 ka Certificates of Occupancy ngadto sa 143 ka pamilya  timaan sa ilang pagpanag-iya sa mga balay nga gitawag ug “Onsite Modified Shelter” sa DSWD. Maoy mitunol niini sila si Senior Board Member Tyron Uy, Mayor Reynaldo Navarro, ug Board Member Macario Humol nga misaksi sa gihimong MOU Signing kauban ni  Penongs Chief Finance Officer Vanessa Mae Uy-Santos.

Giklaro sad ni Mr. Cayme nga ang bahin sa Market ug Production sa Barbecue Sticks kabahin lang sa mga kaayohan nga ilang maangkon. Kini tungod gimando sad ni Gov. Uy ang padayong pag-agak kanila pinaagi sa paghatag ug enterpreneurals training ug uban pang mga tabang aron molambo ang kahimtang sa ilang pamuyo.  (gilbert m. cabahug, ids-comval)