New Bataan Youth Farmers nang hawod sa 4-H Achievement Contest

by Gilbert M. Cabahug

COMPOSTELA VALLEY PROVINCE-----Human naangkon ang dagkong mga kadaugan sa lain-laing mga kategorya, maoy nahimong Overall Champion  ang Youth Farmers sa lungsod sa New Bataan sa kinatas-ang Score nga 87 Points atol sa bag-o nahumang “Provincial Farm Youth/4-H Achievement Cum Literary-Musical Contest” nga gipasiugdahan sa probinsiya.

Sa gihimong Friendly Competitions sa Kapitolyo niadtong Marso 20, 2014, gisakmit sa New Bataan Youth Farmers ang dagkong mga kadaugan sa mokabat unom ka mga kategorya. Sila maoy  1st Prize Winner sa Poster Making Contest; 1st Prize Winner sa Banana Processing and Preservation Contest; 1st Prize Winner sa Extemporaneous Speech Contest; 1st Prize Winner sa Rice Production Contest; ug sa Handy Craft Category sila maoy 1st Prize Winner sa Livestock and Poultry by Products Contest ug 1st  Prize Winner sad sa Husk Doll Making Contest.

Nagsunod sa New Bataan Youth Farmers ang mga taga-Maragusan sa Score nga 60 Points, ug ikatulo ang mga taga Monkayo sa Score nga 57 Points. Ang mga taga-Maragusan maoy 1st Prize winner sa Corn production. Samtang, ang taga-Monkayo maoy 1st Prize Winner sa Handy Craft Corn Husk Flowers and Novelties Display.

Ilalom sa temang “Produktibong Kabataan, Kaagapay sa Kabuhayan at Kaunlaran,” ang  mga Youth Farmers gikan sa onse ka mga lungsod sa ComVal nagtapok sa Kapitolyo ug maoy labing dakong kalihukan atol sa ilang panagtapok ang gihimong friendly competitions sa lain-laing mga kategorya.

Ilalom sa Farm Youth Development Program ni Gov. Arturo “Chiongkee” Uy, giila ug gihatagan sa liderato sa probinsiya ug hugtanong suporta ang mga kalihukan nga makapalambo sa katakos ug abilidad sa mga batan-ong mangunguma sa ComVal. Apil na niini ang paggahin ug adlaw nga sila managtigom aron mapasidunggan ug mapahalipayan. Gitinguha usab sa probinsiya nga ang gihimong panagtapok makapromotar sa panaghiusa, malipayong panag-uban, panagsandurot ug nakahatag kanila’g dugang kadasig sa padayong pagpalambo sa ilang kahibalo ug katakos.  (gilbert m. cabahug, ids-comval)