by Gilbert M. Cabahug
COMPOSTELA VALLEY PROVINCE-----Gawas sa talagsaong kahanas sa panguma, gipakita sad sa mga kabatan-onang mangunguma sa ComVal nga bisan sa arts, literary, ug sa musika dili sad sila maulahi, ug ang ilang abilidad pwedeng hitupngan apan lisud malabwan.
Kini maoy napasundayag sa Comval Youth Farmers nga sakop usab sa 4-H Club gikan sa 11 ka mga lungsod atol sa gihimo nilang panagtapok diha sa Kapitolyo niadtong Marso 20, 2014 alang sa usa ka adlaw’ng “Provincial Farm Youth/4-H Achievement Cum Agri-Skills and Literary Musical Contest” nga gipasiugdahan sa probinsiya.
Ilalom sa Farm Youth Development Program ni Governor Arturo “Chiongkee” Uy, giila ug gihatagan sa liderato sa probinsiya ug hugtanong suporta ang mga kalihokan nga makapalambo sa katakos ug abilidad sa mga batan-ong mangunguma sa ComVal. Apil na niini ang paggahin ug adlaw nga sila managtigom aron mapasidunggan ug mapahalipayan.
Gitinguha usab sa probinsiya nga ang gihimong panagtapok makapromotar sa panaghiusa, malipayong panag-uban, panagsandurot ug nakahatag kanila’g dugang kadasig sa padayong pagpalambo sa ilang kahibalo ug katakos. Sa gihimong panagtapok, ang Youth Farmers gikan sa onse ka mga lungsod sa ComVal malipayong nag-engkwentro sa lain-laing Friendly Competitions may labot sa panguma ilalom sa lain-laing mga kategorya.
Sa crops adunay contests sa Banana Processing and Preservation, Asexual Propagation (grafting) contest sa Cacao, ug Rice and Corn Production Contest. Aduna say handicraft contest nga naglakip sa corn husk flower arrangement and novelties, handicraft contest sa livestock and poultry by product, contest sa corn husk doll making, ug handicraft contest sa livestock and poultry by products.
Dugang sa gihimong friendly competitions ang gihimong engkwentro sa extemporaneous speech, engkwentro sa quiz bee, enkwentro sa poster making, ug OPM-minus one singing contest. (gilbert m. cabahug, ids-comval)
No comments:
Post a Comment