632 ka mga balay gitunol ni Vice. Gov. Way K sa Monkayo

by Gilbert M. Cabahug

COMPOSTELA VALLEY PROVINCE-----Gi-turn-over na sa liderato sa probinsiya ug sa  Department of Social Welfare & Development (DSWD) ang bag-o nahumang 632 ka mga balay diha sa Monkayo, ug mismong si Vice Gov. Manuel “Way Kurat” Zamora maoy nangulo sa pagtunol niini diha sa pito ka mga barangays sa lungsod.

Unang giturn-over ang 120 ka mga balay sa Brgy. Awao niadtong Marso 5, 2014 ug nahatagan sa ilang tagsa-tagsa ka Certificate of Occupancy ang   120 usab ka pamilyang sakop sa Neighborhood Association of Shelter Assistance (NASA) sa nasangpit nga barangay.

Ang apil sa NASA mao kadtong mga pamilya nga totally damaged sa milabayng bagyong Pablo ang ilang mga balay, ug tungod anaa sila sa lugar nga giilang build zone  sa gobyerno, sila mi-qualify alang sa “on site reconstruction”  tungod dili na kinahanglan ang pag-relocate  pa kanila.

Pagka-Marso 6, gitunol ang 512 ka mga balay pinaagi lakip ang tagsa-tagsa ka Certificate of  Occupancy ngadto sa mga pamilya diha sa laing unom pa ka mga barangays sa Monkayo nga mao ang Brgy. Banlag-120 ka pamilya, Brgy. Poblacion-150,  Brgy. Union-50, Brgy. Casoon-70, Brgy. Naboc-72, ug Brgy. Mamonga-50.

Kining kwartaha nagagikan sa opisina sa DSWD ilalom sa ilang “Modified Shelter Assistance Program”(MSAP), ug ang  kada balay adunay budget nga P70,000.00 alang sa mga materyales ug laing P22,600.00 alang sa labor Component.  (gilbert m. cabahug, ids-comval)