Gov. Uy ipadayon ang 100% nga suporta sa mga kalihukan sa Boy Scout

by Gilbert M. Cabahug

COMPOSTELA VALLEY PROVINCE-----Magpadayon gihapon ang 100% support ni Gov. Arturo “Chiongkee” Uy sa mga kalihukan sa Boy Scout of the Philippines ComVal Council, ug matud ni Senior Board Member Tyron Uy nga apil sad ang tanang mga lumilihok niini padayon gihapon sila nga makatagamtam sa iyang 100% support.

Si Senior Board Member Tyrone Uy maoy mihatag sa mensahe sa gobernador atol sa 8th Annual Local Council Meeting (ALCM) nga malampusong gihimo sa Kapitolyo niadtong Marso 21, 2014. Matud pa niya nga sama sa iyang amahan siya usab padayong motunol sa hugtanong suporta ug tabang sa mga kalihukan sa Boy Scout. Kini tungod ang mga kalihukan niini labi na ang pagsunod sa scout laws, haom kaayo sa iyang adbokasiya ug dakong tinguha nga mahatagan ug kasegurohan nga mapalambo ang mga kabataan ug kabatan-onan sa ComVal.

Iyang kauban nga mihatag usab sa ilang mensahe sila si Assistant Schools Division Supervisor Dee Desilva nga maoy mihatag sa Wecome Message ni SDS Nenita E. Lumaad, ug si Scouter Jesus M. Meris ang kasamtangang Scout Director sa Boy Scout of the Philippines Eastern Mindanao Region.

Gihimo atol sa bag-o nahumang 8th Annual Local Council Meeting ang election alang sa upat ka mga sakop sa Council Executive Board nag-expire karong tuiga ang ilang tulo ka tuig nga termino, ug  sa malampusong piniliay subli gihapon nga gipili sila si Gov. Uy, Provincial Treasurer Carmen Razul, ug SB Member Vivencia L. Secuya.  Samtang, maoy napili aron mohulip kang Madam Carmen Agustin si Mr. Jonathan A. Banez.  (gilbert m. cabahug, ids-comval)