Dugang 143 ka mga balay gipanghatag sa 143 sad ka pamilya sa Laak

by Gilbert M. Cabahug

COMPOSTELA VALLEY PROVINCE-----Dugang 143 na sad ka bag-o nahumang mga balay ang gitunol sa liderato sa probinsiya ug sa Department of Social Welfare and Development (DSWD) ngadto sa 143 sad ka pamilya sa lungsod sa Laak.

Nahatagan niining mga balaya nga gitawag ug “Onsite Modified Shelters” ang 104 ka pamilya sa Brgy. Banbanon ug ang 39 ka pamilya diha sa Brgy. Kaligutan.

Kining mga balaya maoy mi-kumpleto sa mokabat 1,265 ka mga balay nga gipanghatag sa gobyerno ngadto sa Typhoon Pablo Victims diha sa lima nga giilang Hard-Hit Municipalities sa ComVal nga mi-qualify sa “On Site Reconstruction” tungod diha sila sa lugar nga giilang build zone sa DOST ug sa MGB,  sa ingon dili na kinahanglan ang pag-relocate pa kanila.

Ang turn-over ceremony didto himoa sa Brgy. Kaligutan niadtong Marso 11, 2014 ug maoy mitunol niini pinaagi sa pagtunol usab sa ilang tagsa-tagsa ka Certificate of Occupancy sila si Senior Board Member Tyron Uy, Mayor Reynaldo Navarro, Board Member Macario Humol,  ug mga dagkong opisyal sa DSWD.

Kining mga balaya maoy labing ulahi nga giturn-over sa mokabat 1,265 ka mga balay nga naapil sa 1st trance sa kinatibuk-ang commitment ni Pangulong Benigno S. Aquino-III alang sa pabalay sa ComVal. Nagagikan  ang pundo sa DSWD ilalom sa ilang Modified Shelter Assistance Program (MSAP) alang sa “On Site Reconstruction” sa totally damaged houses diha sa mga lugar nga gidekalarang build zone sa gobyerno.  (gilbert m. cabahug, ids-comval)