Tungod sa talagsaong pag-uswag sa katakos ug abilidad sa pagtudlo nga naangkon niadtong mga magtutudlo nga nakahuman sa mga pagbansay nga libreng gitunol sa probinsiya ilalom sa Project Arturo 2, mas midaghan karon ang ihap sa mga magtutudlo gikan sa onse ka mga sa Compostela Valley nga gusto mamahimong Arturo Reading Teachers.
Ang Project ARTURO kon Accelerated Readers Tomorrows Ultimate Response to Opportunities maoy usa sa mga mahinungdanong Reading Program nga giimplementar ni Gov. Arturo “Chiongkee” Uy sa Compostela Valley. Maoy nagdumala niining programaha si kanhi SDS Lilian Calicdan.
Tumong niini mao nga maatiman kadtong elementary pupils nga bisan anaa na sila sa taas nga ang-ang sa elementarya apan dili pa gihapon sila makamao mobasa. Lakip sad sa gitumong niining programaha mao kadtong elementary pupils nga kon makabasa man dili sad makasabot sa ilang gibasa kon kulang sa reading comprehension.
Ang unang grupo sa ARTURO Reading Teachers gipailalom sa duha ka adlawng Seminar-Workshop niadtong Agusto,2012, ug maoy ilang facilitators ang mga batid ug hanas sa DepEd nga sila kanhi Davao del Norte Schools Division Superintendent (SDS) Dr. Aurora B. Cubero ug kanhi Davao City SDS Dr. Ma. Ines C. Asuncion nga karon na re-asign diha sa Panabo City.
Human sa duha ka adlawng “Seminar-Workshop on Teaching Beginning Reading” nga libreng gitunol sa probinsiya ilalom sa Project ARTURO 2, sila gipatudlo na sa mga nailang non-reading pupils sa gipiling Pilot E.Schools nga mao ang New Visayas E.S. sa Montevista; ang Talian E.S., ang New Katipunan E.S., ug ang Coronobe E.S. sa Maragusan; ang Boay E.S. sa Monkayo; ang Araibo E.S. sa Pantukan; ang Candinuyan E.S. sa Mabini; ug ang Belmonte E.S., Longganapan E.S. ug San Antonio E.S. sa Laak.
Sa pipila ka bulan nilang pagpanudlo nakita sa kadagkoan sa DepEd ang dakong kalampusan ug maayong resulta sa ilang trabaho, mao nga ang ilang gidaghanon gidugangan sa probinsiya pinaagi sa pagtunol ug lain pa nga libreng training pinaagi sa duha ka adlawng Echo Seminar-Workshop. Niining higayona mao nay nahimong Facilitators ang upat ka mga hanas nga ARTURO Reading Terachers nga sila Andy P. Cabudoc; Delilah Q. Gaño; Myrna D. Relatado; ug Esther U. Calicdan. (gilbert cabahug/ids comval)
No comments:
Post a Comment