Friday, May 17, 2013

Pagsulod ni Tyron sa politika gi-welcome sa mga Comvaleño pinaagi sa pinaka-dakung boto


Bag-o pa lang siya nga nagsulod sa pulitika sa probinsiya sa Compostela Valley apan gipakita na sa mga katawhang Comvaleño nga nagustuhan gyod nila si Tyron  Uy nga  siya moserbisyo usab kanila pinaagi sa paghatag kaniya sa ug dakung boto sa milabayng Mayo 13,2013 nga piniliay.

Sa gihimong Proclaimation of winners ni COMELEC Election Supervisor Atty. Jennifer Ponpon Ancla sa mga mananaug nga Liberal Party Provincial ug Congressional Candidates sa Comval niadtong Mayo 16,2013, opsiyal niyang gipahibalo diha sa kapitolyo ang boto nga mokabat 94,313 nga gihatag sa batan-ong Uy sa mga katawhan diha sa distrito 2.

Si Tyron nagsugod pagserbisyo sa katawhan human nga siya maoy gitudlong Provincial Sports Coordinator ni Gov. Uy sa Compostela Valley niadtong 2011. Sa 2012 siya sad maoy gitahasan sa iyang amahan sa School Chairs Distribution kon pagpanghatag ug mga lingkoranan sa pampublikong mga tulunghaan sa elementarya ug sa sekondarya diha sa mga kabarangayan sa onse ka mga lungsod sa Comval

Tungod sa iyang mga maayong nahimo ug nakitang kadasig sa serbisyo publiko, daghan sa iyang mga suporter ug kahigalaan ang nag-awhag kaniya nga palapdan pa ang iyang pagpanerbisyo sa katawhan pinaagi sa pagsalmot sa Mayo 13,2013 nga piniliay.
Nagsunod kang Tyron nga mihakot usab ug taas nga mga boto sila si SP Members  Atty. Ruwell Peter Gonzaga sa boto nga 88,602; Cesar Richa nga dunay 79,510 votes; Moran Takasan sa boto nga 73,367; ug Macario Humol sa boto nga 69,766.
Dungan kanila nga giproklamar na usab sa COMELEC nga mga mananaug sa Mayo 13 2013 nga piniliay sila si Gov. Arturo “Chiongkee” Uy nga sa partial official result mitala ug 188,598 votes; si Vice Gov. Manuel “Way kurat” Zamora nga nakaangkon ug boto nga 149,410 sa partial official result; si 1st District  Congw. Maricar Zamora nga nakaangkon ug 72,881 votes sa Partial Official Result; ug si 2nd  District  Cong. Rommel “ Bubong Amatong sa boto nga 122, 779 sa Final Official Result. (gilbert cabahug/ids comval)

No comments:

Post a Comment