Gov. Uy: Human election maoy pinakamaayong panahon sa pagpangampanya

by Gilbert M. Cabahug

COMPOSTELA VALLEY PROVINCE-----Giklaro ni Governor Arturo “Chiongkee” Uy nga dili sa campaign period kun dili karon nga human na ang election maoy pinakamaayong panahon sa pagpangampanya. Matud pa niya nga maoy pinakamaayong himoon niadtong mga nakadaug sa milabay’ng piniliay sa Mayo 13 ang pagbisita diha sa mga kabaranggayan aron sayron ang mga problema ug  panginahanglan sa mga katawhan sa ingon mamahimo silang effective sa service delivery nga maoy ilang gisaad kanila panahon sa ilang pagpangampanya.

Sa iyang paghatag ug report panahon sa Convocation Program sa mga empleyado sa Kapitolyo niadtong Mayo 20, gipahibalo usab sa gobernador ang iyang dakong kalipay tungod  mikuyog sa iyang panawagan ang mga katawhang Comvaleño pinaagi sa ilang pagboto sa halos tanang mga kandidato nga iyang kaalyado. Gani, midaug gyod ang tanang kandidato sa Sangguniang Panlalawigan ilalom sa Team Comval.

Gipahibalo usab niya ang iyang pagsuroy sa mga eskwelahan aron tambongan ang nagpadayong “Brigada Eskwela” sa DepEd aron nga siya usab makahatag ug dakong ayuda sa mga magtutudlo ug nagdumala sa pampublikong mga eskwelahan diha sa mga kabaranggayan sa onse ka mga lungsod nga naningkamot nga mapanindot ug mahimong komportable ang tulunghaan nga kabahin sa ilang pagpangandam sa pag-abli sa klase sa bulan sa Hunyo. (Gilbert M. Cabahug, ids-comval)