Tyron motabang sa COMET ug uban pang Reading Programs sa ComVal

by Gilbert M. Cabahug

COMPOSTELA VALLEY PROVINCE------Aron ang mga kabataang Comvaleño makaangkon sa  mas masanag nga kaugmaon sa moabot nga mga adlaw, gipasalig karon ni SP Member Elect Tyron Uy nga motabang  gayud siya nga mas mapalapdan ug mas mapahugtan pa ang padayong pag-implementar sa COMET kon Compostela Valley Transforming Education Today  project ug sa uban pang reading programs nga giimplementar ni Governor Arturo “Chiongkee” Uy sa Compostela Valley sama sa Project ARTURO 2 (Accelerated Readers, Tomorrow’s Ultimate Response to Opportunities).

Si Tyron maoy usa sa mga mihatag ug mensahe ngadto sa mokabat 130 ka mga LGU ug DepEd Officials gikan sa probinsiya sa Saranggani atol sa gihimo nilang Courtesy Visit ngadto kang Gov. Uy diha sa Kapitolyo niadtong Mayo 20, 2013.

Gawas kang Gov. Uy kauban usab ni Tyron sila IP Sectoral Representative SP Member  Augusto Blanco, Jr., SB Member Vivencia Secuya, ug uban pang mga dagkong opisyal sa Kapitolyo sa pag-abi-abi ug pag-atiman sa taga-Saranggani nga mga bisita pinaagi sa hamubong programa ug sa pagdalit kanila ug paniudto.

Sila mao kadtong mga sakop sa Project Monitoring Teams (PMTs) sa QUEST  kun Quality Education for Saranggani Today, nga maoy gibasehan sa pagmugna sa COMET nga usa sa mga reading projects nga padayong giimplementar ni Governor Uy sa Compostela Valley.  Maoy partner sa probinsiya sa proyektong COMET ang Alcantara Foundation. 

Gitug-an ni Janice Clarion sa HRMD nga ilalom sa proyektong COMET ang probinsiya ug  ang Alcantara Foundation  nagtinabangay pag-atiman sa mga elementary pupils nga bisan anaa na sila sa taas nga grado sa elementarya maglisod gihapon pagbasa, ug kun makabasa man maglisod sad sila pagsabot sa ilang ginabasa kun kulang sa reading comprehension.

Pilot sa proyektong COMET ang duha ka pampublikong mga tulunghaan sa elementary sa Nabunturan nga mao ang Bukal Elementary School ug ang Matagdungan Elementary School. Laing Pilot niining proyektoha mao ang Panoraon Elementary School diha sa lungsod sa Maco.

Pipila sa mga maayong butang nga gipanghimo ilalom sa proyektong COMET ni Gov. Uy mao ang pagpanghatag ug libre nga mga libro sa grade school pupils; ang 15-day tutorial; ug ang gihimong parent mentoring.  (Gilbert M. Cabahug, ids-comval)