Miabot na karon sa 518 kabus nga mga pamilyang Comvaleño ang nakaangkon ug libreng balay ilalom sa nagpadayong Housing Development Program ni Gov. Arturo “Chiongkee” Uy sa Compostela Valley. Ang pagtukod niining mga balaya gisugdan sa probinsiya niadtong 2009.
Tungod sa iyang dakong tinguha nga makaangkon ug nindot nga pinuy-anan kadtong labing naglisud nga mga katawhang Comvaleño maoy gihimo ni Gov. Uy ang pag-pakig partner sa sa Gawad Kalinga(GK) Foundation nga gidumala sa Couples for Christ sa simbahang Katoliko. Ang maong partnership gitawag karon ug USWAG-Gawad Kalinga, ug pinaagi niini ang probinsiya nakatukod na ug 518 ka mga balay.
Gikasabotan sa gihimong partnership ang himoong pagtinabangay sa probinsiya ug GK Foundation sa pag-atiman sa mga katawhang kabus sa probinsiya sa Comval pinaagi sa pagtukod ug nindot nga balay alang kanila nga libre ug walay bayad nilang mapuy-an.
Sa pagtukod niining mga balaya, ang probinsiya ug GK Foundation nangita ug partner gikan sa lain-laing sector sa mga katawhan nga dunay maloloy-on ug manggihatagong kasing-kasing. Kadtong mga bahandianon gipatabang pinaagi sa pagdonar ug salapi nga maoy gigamit sa pagpamalit ug mga materyales. Samtang ang uban, gipatabang usab sa mga mahinungdanong trabahoon panahon sa Construction.
Dungan ang gihimong pagtukod ug mga balay diha sa gimugnang USWAG GK Villages sa 11 ka mga lungsod, ug maoy unang gitukod ug dungan sa mga Bayani Builders ang 50 ka mga balay diha sa USWAG-GK Designer Village sa Brgy. Kinuban Maco niadtong Enero 24-30, 2009 atol sa gihimong 1st USWAG-GK 1 MB. Human niini ang nagsunod-sunod nga People Power nga paagi sa pagtukod ug mga balay diha sa onse ka mga lungsod sa Compostela Valley.
Dugang 38 ka mga balay ang gitukod ug dungan niadtong Mayo 8-16,2009 diha sa USWAG-GK Designer Village gihapon; 116 balay diha sa CSAP USWAG-GK Village sa Brgy. Kinuban gihapon sa Maco; 48 ka mga balay sa Monkayo niadtong Abril-9-17,2010; 20 ka mga balay sa Abril 10-17, 2010 sa Poblacion New Bataan; 50 ka mga balay niadtong Oktobre 16-23,2010 diha sa Laak; 38 sa Compostela niadtong Abril 26 - Mayo 3,2011; 40 sa Pantukan niadtong Agusto 19-26,2011; 28 ka mga balay sa Mabini niadtong Mayo 8-14,2012; ug laing 40 ka mga balay diha sa Brgy. Tuboran, Mawab niadtong Nob. 28-Desyembre 5,2012.
Niadtong Marso 23-27 dugang 50 na sad ka mga balay ang nahuman pagtukod sa nagtinabangay nga mga katawhan diha sa SOP Kahiusahan USWAG GK Village sa Brgy. Osmeña sa Compostela. (gilbert cabahug/ ids comval)
No comments:
Post a Comment