Sa Comval: 251 Barangays nakadawat ug proyekto sa ATU PEACE Program ni Gov. Uy

COMPOSTELA VALLEY-----Miabot na karon sa 251 barangays sa onse ka mga lungsod sa probinsiya sa Compostela Valley  ang nakadawat na ug tag P300,000.00 nga kantidad sa proyekto nga gibubo sa probinsiya ilalom sa “Assistance Towards Unity for Progress thru Empowerment, Accountability, Cooperation, and Efficiency (ATU PEACE) Program” ni Governor Arturo “Chiongkee” Uy.

Ang ATU PEACE Program sa gobernador usa nag-unang mga pamaagi sa probinsiya sa pagbubo ug mga proyekto diha sa mga kabaranggayan nga gibase sa mas gipalapad nga KALAHI-CIDDS

Program sa Department of Social Welfare & Development (DSWD).  Sama sa  KALAHI-CIDDS ang community maoy gihatagan ug katungod sa pagpili sa proyekto nga gusto nilang ihatag sa ilang Barangay gamit ang pundo nga mokabat P300,000.00 gikan  sa probinsiya.

Pinaagi sa ilang  Brgy. Development Council, ang identified nilang proyekto ilang isulod diha sa ilang Brgy. Development Plan nga maoy ilang isumiter ngadto sa Municipal Development Council alang sa pag-review.  Ang MDC maoy mo-endorso niini ngadto sa probinsiya ingon nga proseso sa gipahugtang transparency and accountability in public service delivery sa provincial nga liderato.

Sa gihimong pag-evaluate sa ATU-PEACE Program ni Governor Uy sa Comval, nasayran  sa DSWD nga  kini usa gayod ka “enhanced version” sa ilang programa nga “Kapit Bisig Laban sa Kahirapan-Comprehensive and Integrated Delivery of Social Services” kun KALAHI-CIDDS. Kini gikalipay ug dako sa DSWD Central Office labi na nga ang pundo nga gigamit sa ATU-PEACE nagagikan sa PLGU Comval.  (Gilbert M. Cabahug, ids-comval)