Compostela Valley Province – Nakaabot na sa Comval ang usa ka simbolikong pagbiyahe sa moskitero contra malaria kon Long lasting Insecticide Treated Nets (LLIN) nga gihatag sa DOH ug sa Global Fund Malaria pinaagi sa Pilipinas Shell Foundation aron hingpit na nga masumpo ang makamatayng sakit.
Ang maong kalihokan gitawag ug Biyaheng Kulambo kon Traveling LLIN, nga nagsimbolo sa libo ka libong mga Moskitero gikan sa DOH ug sa partners niini nga mao ang Global Fund Malaria ug Pipinas Shell Foundation Inc. (PSFI) nga padayong gipanghatag nga libre ug walay bayad sa mga katawhan sa mga probinsiya sa nasud nga gipiling Global Fund Areas.
Apil sa mga gipiling Global Fund Areas ang probinsiya sa Compostela Valley nga nakabenepisyo ug dako sa gatusan ka libong mga moskitero contra malaria nga gitunol sa Global Fund pinaagi sa PSFI. Kining mga moskiteroha (LLIN) gipanghatag sad dayon ni Gov. Uy nga walay bayad sa mga katawhan diha sa giilang Malaria Endemic Barangays kon mga kabaranggayan sa onse ka mga lungsod nga daghay mga tawo nga nabiktima kon natakboyan niining sakita.
Ang LLIN maoy gipili sa kauluhan nga mamahimong simbolo sa Malaria Control Program sa nasud, ug ilalom niining programaha gipasukad sa gobyerno ang intervention meaasures, mga kalihokan, ug hiniusang mga paningkamot aron hingpit na nga masumpo ang makamatayng sakit.
Ang “Biyaheng Kulambo” gisugdan didto sa Banaue, Ifugao atol sa CAR Region 2 Malaria Summit nga gipanguluhan ni DOH Sec. Enrique T. Ona niadtong Abril 25,2012. Gikan didto ang simbolikong biyahe sa LLIN mituyok sa laing siyam pa ka probinsiya sa nasud, ug niadtong Hulyo 9 kini nakaabot sa Compostela Valley nga mao ang 30th province sa nasud nga naapil sa giilang Global Fund Areas.
Labing mahinungdanong kalihokan mao ang Ceremonial Transfer sa LLIN dungan sa gibasang rationale narrative; ang acceptance Message ni Gov. Uy nga gipabati ni Executive Assistant Isabelo Melendres; ang pagbasa sa manifesto of support niining programaha sa probinsiya nga gipirmahan sa gobernador; ug ang pagbutang sa Provincial Logo nga maoy makitang simbolo sa dakong suporta ug kalambigitan sa probinsiya niining programaha. (gilbert cabahug/ids comval)
No comments:
Post a Comment