Laing mga batang malnourished na sad ang gi-adopt sa mga empleyado sa kapitolyo sa Compostela Valley, ug kining mga bataa nagpuyo diha sa duha ka mga Barangay sa Mawab. Sila maoy 3rd batch sa nagapadayong Adopt a Child Program ni Gov. Arturo “Chiongkee” Uy-usa sa mga inobasyon sa Comval Provincial Nutrition Council nga gituyo pagmugna aron mas mokunhod pa ang Malnutrition Rate sa probinsiya.
Kabahin sa gihimong launching sa gihimong pagsalmot sa probinsiya 38 Nutrition Month Celebration niadtong Hulyo 9 diha sa kapitolyo mao ang Ceremonial Kck-off alang sa ika-3 hugna sa Adopt-a-Child Program, ug atol niini gipanghatag na sa matag Departmento ang Folder nga nasulatan sa mga mahinungdanong kasayuran kabahin sa personalidad sa ilang taga-tagsa ka Adopted Child.
Ilalom sa maong programa, ang mga empleyado sa kapitolyo nag-grupo base sa ilang Departamento, Division, ug Section aron mag-angkon ug usa ka batang malnourished nga ilang i-adopt aron pagluwas kaniya sa nasinatiang grabeng kakulang sa nutritional intake nga nasayran human sa gihimong pagtimbang.
Matud ni Analyn Vigilia - Nutrition Coordinator sa District 1 ug maoy Focal sa Adopt a Child Porgam, nga 3rdbatch sa Adopt a child ang 24 ka mga batang malnourished sa lungsod sa Mawab nga gi-adopt karon sa mga empleyado sa probinsiya. 13 kanila taga-Brgy. Nueva Visayas ug 11 ang mga taga Nuevo Iloco.
Gikan sa kaugalingon nilang kinitaan, ang mga empleyado sa kapitolyo nag-amotay sa kada semana, ug ang kwarta nga ilang matigom maoy gigamit nila sa pagpamalit sa mga masustansiya ug puno sa bitaminang mga pagkaon ug mga Food Supplement, nga maoy gihatag sa mga ginikanan sa bata. Ang maong kalihokan gihimo sa mga empleyado sulod sa 120 ka feeding days.
Gipasabot ni Nena Mirafuentes-Provincial Nutrition Coordinator sa Compostela Valley, nga gawas sa mga pagkaon nga gihatag sa mga empleyado ngadto sa ilang adopted matag-semana, ang “Adopt a Child Program ni Gov. Uy maoy nahimong point of entry sa mga dagkong tabang nga gipanghimo sa mga empleyado sa probinsiya ngadto sa mga ginikaan ug sa tibuok pamilya sa mga batang malnourished nga ilang adopted. (gilbert cabahug/ids comval)
No comments:
Post a Comment