DavNor tutuk pagpangandam batok kalamidad

ni Noel Baguio

Hugtanon karon ang ginahimo nga pagpangandam sa Lalawigan sa Davao del Norte alang sa nibisan unsang taliabot nga kalamidad.

Gisaysay ni Provincial Disaster Risk Reduction Management Council (PDRRMC) Action Officer Sonio Sanchez nga gilihok sa Council ang hingpit nga pagpangandam, aron mokunhod ang impact kon kadaot nga dala sa disaster.

“Kung andam ang atong mga komunidad sa hulga sa kalamidad, mokunhod ang kakuyaw,” sulti ni Sanchez, ilabi na sa possibleng mahitabong pagbaha, paglinog, pag-landslide, sunog ug uban pang katalagman.

Kini, matud niya, subay sa ‘marching order’ o kon mando ni Gov. Rodolfo del Rosario nga pakusgon ang pagpangandam sa probinsya partikularmente sa panahon nga ‘normal’ ug wala pay miabot nga kalamidad.

Sa gisugdan nga regular Reduce D’ Risk (RDR) talk show sa Provincial Information Office Studio, gisaysay ni Sanchez ang risk reduction program sa lalawigan labot sa kasaulogan sa National Disaster Consciousness Month karong bulan sa Hulyo.

Gipaniguro niya nga han-ay na ang plano sa kalihokan sa PDRRMC sa wala pa mahitabo ang disaster, sa dihang nahitabo na kini ug usab pagkahuman niini.

Aron pakusgan ang kapasidad sa probinsya, migahin ang PDRRMC ug P61.2 million aron  sa pagtukod ug PDRRM operation center, pagpalit ug rescue armory vehicle ug fiber boat, pag-establisar ug automatic early warning system, pagrehab sa kadalanan ug drainage systems,  pagpalit ug amphibious backhoe alang desilting sa mga suba, ug uban pa.

Butyag ni Sanchez nga napahiluna na ang incident command centers sa mga LGUs, aron maoy mo-coordinate ug modumala sa tanang disaster operation ug resources sa panahon sa katalagman.

On-call usab kanunay ang mga hanas nga miyembro sa RDR rescue unit sa probinsya aron sa pagresponde sa emergency situations bisan asang dapit sa lalawigan.

Nagpadayon sab ang info campaign sa PIO mahitungud sa pagpangandam pinaagi sa radyo ug uban pang media, kung asa gilakbit ang pahimangno ni Gov. Rodolfo del Rosario alang sa katawhan sa pag-andam "aron malikayan ang kasubo."